Шайтон ва жин босган ўлка

Мексикани қоплаб олган “Муқаддас ўлим” тариқатига қарши жин чиқарувчилар уруш очди. Ўлканинг шайтон ишғолида эканлигига ишонадиган роҳиблар бу ишни раҳбалик қилшмоқда.

Мексикада инсонлар ақлдан озибди деб ўйлашингиз мумкин. Чунки халқ бир тентакона тариқатга бошлари билан шўнғиган. Калла суякли маъбудасига қуллик қиладиган тариқат аъзолари черковни ва давлатни мувозанатдан чиқаришди.

Роҳиблар шайтон ва жинларнинг ўлкани ишғол этишганини эълон қилишди.

Бундан ташқари давлат раҳбарлари ҳам “жинларнинг” инсонларга кириб олганига ишонишмоқда. Чунки гиёҳванд моддалар савдоси билан шуғулланадиган тўдаларга қарши бошлаган уруш учун минглаб роҳибларни “жин чиқарувчи” сифатида чақиртиришган.

Мексикадаги католик черковининг гапига қараганда ўлкаларида Тангри билан Шайтон қиёсий жангга киришишган. Баъзиларга эриш туюлса ҳам, роҳиблар Мекисканинг шайтон ҳужумига учраганига ва унга қарши курашда кўпроқ жин чиқарувчиларга эҳтиёж борлигига ишонишмоқда.

Бу ҳужумнинг 2006 йилдан бери ўлкани қамраб олган гиёҳвандликка алоқадор ҳодисаларда ўзини намоён қилганини айтишмоқда. Расмий рақамларга кўра, бу даврда Мексикада 70 минг киши ўлган.

Иблис шу ерда

Мексикада сўнгги йилларда одам этини жимирлатадиган бир ваҳшат манзараси бор. Ўқувчилар мактабга кетаётиб йўлда сочилиб ётган жасад бўлакларига гувоҳ бўлишмоқда, инсонлар ишга кетаётиб кўприкларга осилган жасадларга дуч келишмоқда. Католик черкови роҳиблари буларнинг барини Иблиснинг ўлкаларига жойлашиб олганига боғлашмоқда.

Мехико шаҳрида роҳиб ва жин чиқарувчи поп Карлос Триана “BBC”га берган интервьюда қуйидагиларни гапирди: “Бутун бу катта ва тизимли даҳшатлар ортида қора куч сифатида иблиснинг турганига ишонамиз. Шу сабабли Тангри қутулиш учун, шайтонга қарши курашиш учун жин чиқарувчиларни чорламоқда.”

“Муқаддас ўлим” тариқати

Ўлкада халқ чорасизликдан ҳар хил бемаъни тариқатларга берилиб кетишган. Буларнинг ичида энг кўп тарафдор тўплагани эса “Муқаддас ўлим” тариқатидир.

Келинлик либосини кийиб олган ва қўлида чалғи ўроқ тутган бош ўрнида калла суяги тасвирланган маъбудасига сиғинадиган тариқат аъзоларининг сони Мексикада 8 миллионга етганлиги, Лотин Америка давлатлари билан АҚШ ва Канадада эса бундан ҳам кўп экани тахмин қилинмоқда.

Инсон қурбон қилишади

Энг ғалатиси, гиёҳванд моддалар сотиш билан шуғулланадиган жиноятчиларнинг ҳам кўпчилиги ушбу тариқатга эргашишади. Полиция қўлига тушмаслик учун дуо қиладиган бу жиноятчилар дуоларининг қабул бўлиши учун эса, худоларига одам қурбонлик қилишади. Попларнинг фикрича “Мексикада зўравонликнинг ортишининг сабаби шу.”

Жин чиқарувчиларнинг бозори чаққон

Охирги йилларда ўлкада энг машҳур ва талабгор одамлар жин чиқарувчилар бўлиб қолган. Уларга энг кўп эҳтиёж сезилаётган жой эса, армиянинг тиш-тирноғигача қуролланган ва кучли молияга эга бўлган наркокартелга қарши сўнгги етти йилдан бери кураш олиб бораётган шимолий минтақалардир. Бу ерларда аскарлар билан параллел равишда роҳиблар ҳам жин чиқарувчи сифатида иш олиб боришмоқда. Эрнесто Каро жин чиқарувчи роҳиблардан бири. Жуда кўплаб жиноятчилардан жин чиқарган роҳиб бир воқеани ҳеч унута олмаслигини айтиб берди. Тўданинг жаллоди бўлган бир жиноятчи инсонларнинг қўл-оёқларини кесганлигини, буни бажараётганда уларнинг йиғлаб, зор қақшашидан завқ олганлигини, баъзиларни тириклайин ўтга ташлаганини айтган.

Бу қандай тариқат?

Мексикада инсонларни фалокатга судраётган “Муқаддас ўлим” тариқати ҳақида иккита китоб ёзган журналист Хосе Хил Олмос тариқат аъзолари орасида жиноятчилардан ташқари полиция, сиёсатчи ва санъаткорлар ҳам борлигини маълум қилди. Олмос тариқат кўпчилик ўйлаганидек Ацтек давридан бери келмаётганлигини, илк бор 18-асрда қайд этилганини айтиб ўтди.

“1990 йиллардаги иқтисодий кризис ортидан ушбу тариқат аъзоларининг сони бирданига кўпайди. Ўрта синфга мансуб бўлган мексикаликлар қийинчилик вақтида умид билан “Муқаддас ўлим” тариқатига ёпишдилар” дейди.

Ўликлар куни

Пойтахтда гиёҳвандлик ва жиноят тўлиб-тошган Тепито районида тариқатнинг ҳар йили нишонлайдиган кунлари бор. 31 октябрь Мексиканинг “Ўликлар куни” фестивали. Кийим кийдирилган скелетга ҳурматини кўрсатиш учун ушбу фестивалда бир неча минг киши иштирок этади. Баъзилари тиззалаб юришади. Кўплаб кишиларнинг вужудида калла суяги татуировкалари бор.

Черков: Ичларига шайтон кириб олган

Черков таъкидлаганидек бу инсонларнинг ичига шайтон кириб олганми? “Муқаддас ўлим” тариқатига аъзо бўлган 20 ёшли жиноятчи нима учун бу тариқатга кирганини шундай тушунтирди: “Мен Тангрига, Марям онага ва бутун азизларга ишонаман, лекин “Муқаддас ўлим”га кўпроқ ишонаман. Менга у жуда кўп ёрдам берган.”