Тўқаев ШҲТ саммити доирасида Путин билан учрашув ўтказди

Қозоғистон президенти Қосим-Жўмарт Тўқаев Бишкек шаҳрида ўтаётган юбилей ШҲТ саммити доирасида Россия президенти Владимир Путин билан учрашув ўтказди.

Суҳбатдошлар дўстлик, яхши қўшничилик ва иттифоқчилик руҳида изчил ривожланиб бораётган Қозоғистон ва Россия кўп қиррали ҳамкорлигининг динамик характерини қайд этдилар.

Путин Қозоғистон президентини Қурултойга сайловлар муваффақиятли ўтгани билан табриклаб, уларнинг натижалари Тўқаевнинг Қозоғистонни янада ривожлантириш, ички сиёсий барқарорликни мустаҳкамлаш, иқтисодиётни ривожлантириш ва одамларнинг турмуш даражасини ошириш билан боғлиқ кенг доирадаги масалаларни ҳал этиш борасидаги стратегик курсига кенг қўллаб-қувватланишини тасдиқлаганини таъкидлади.

Тўқаев Россия етакчисига табрик учун миннатдорлик билдириб, конституциявий ислоҳот доирасида амалга оширилаётган ишлар ҳақида сўзлаб берди.

"Қозоғистонни модернизация қилиш жараёни миллий манфаатларга мувофиқ давом эттирилади. Ислоҳотлар учун ислоҳотларни ҳеч қачон ўтказиб бўлмайди, биз буни жуда яхши тушунамиз. Аввало, фуқароларимизнинг манфаатларидан келиб чиқишимиз керак. Икки томонлама ҳамкорликка келсак, жорий йилнинг май ойида Остонага амалга оширган давлат ташрифингиз тўлиқ муваффақият билан якунланди, деб ҳисоблайман. Ўзининг характери ва моҳиятига кўра у тарихий бўлди. Ҳозир ҳукумат имзоланган барча битимларни амалга ошириш билан шуғулланмоқда. Савдо жадал суръатлар билан ривожланаётганини тўғри қайд этдингиз. Ўтган йилга нисбатан ўсиш бор. Россия бизнинг асосий инвестиция ва савдо ҳамкоримиз бўлиб қолишига ишонаман. Бу жараённи ҳар томонлама қўллаб-қувватлайман", – деди Тўқаев.

Путин ўз навбатида икки томонлама муносабатларнинг деярли барча йўналишлар бўйича жадал ривожланиб бораётганини юқори баҳолади.

"Ўтган йили товар айирбошлаш кўрсаткичларимиз ёмон эмасди, бу йил эса у яна ошди. Биз кенг кўламли масалалар бўйича ишлаяпмиз. Кун тартибимизда ҳам йирик лойиҳалар, ҳам жорий масалалар бор. Ҳукуматлараро комиссия фаол ишламоқда, биз ҳамкасбларимизга бу фаоллиги учун, барча келишувларимизни бажараётгани учун миннатдорлик билдиришимиз керак. Айниқса, гуманитар соҳадаги алоқаларнинг ривожланаётгани қувонтиради. Қозоғистондан 60 минг нафар талаба Россия олий ўқув юртларида ўқимоқда. Омск шаҳрида яқиндагина Қозоғистон етакчи олий таълим муассасасининг филиали очилди. Деярли барча масалалар бўйича икки томонлама ҳаракатланиш йўлимиз бор. Бугун ушбу мажмуанинг барча жиҳатлари бўйича суҳбатлашиш имкониятимиз бор", – деди Россия президенти.

Давлат раҳбарлари савдо-иқтисодий ва инвестициявий ҳамкорликни мустаҳкамлаш, шунингдек ўзаро қизиқиш уйғотадиган соҳаларда қўшма лойиҳаларни амалга ошириш истиқболларини муҳокама қилдилар.

Шунингдек, халқаро ва минтақавий кун тартибидаги долзарб масалалар юзасидан фикр алмашилди.