АҚШ талабалар визасига янги талаб

АҚШ талабалар визаси учун ариза топшириш жараёнини қайта йўлга қўйди, аммо янги талаб сифатида ариза берувчилар ижтимоий тармоқлардаги фаолликларини ошкора тақдим этишлари шарт қилиб белгиланди. Бу ҳақда Politico сайти хабар тарқатди.

Ташқи ишлар вазирлиги томонидан элчихоналар ва консулхоналарга юборилган кўрсатмада, "сиёсий фаоллик тарихи"га эга бўлган аризаларга алоҳида эътибор қаратиш, уларнинг АҚШ ҳудудида шунга ўхшаш фаолиятни давом эттириш эҳтимолини баҳолаш талаб этилган.

Шунингдек, аризачиларнинг интернетдаги чиқишларида АҚШ фуқаролари, ҳукумати, маданияти ёки конституциявий қимматликларига нисбатан салбий муносабатлар мавжуд ёки йўқлиги текширилиши кўрсатилган.

Қўшимча қилиб, элчихоналардан ариза берувчиларнинг АҚШ миллий хавфсизлигига таҳдид солиш, террорчи гуруҳлар билан эҳтимолий алоқалари ва антисемит ҳаракатларда иштирок этган-этмаганини ҳам ўрганиш сўралган.

Кўрсатмада тилга олинган “онлайн фаоллик” тушунчаси фақат ижтимоий тармоқлар билан чекланмасдан, LexisNexis каби маълумот базаларидаги тижорий ва ҳуқуқий маълумотларни ҳам ўз ичига олади.

Politico нашрининг ёзишича, май ойида АҚШ сенатори Марко Рубио барча дипломатик миссияларга талабалар визаси учун янги рўйхат тузиш жараёнларини вақтинча тўхтатиш буйруғини берган, то ижтимоий медиа маълумотлари тўлиқ йиғилгунча.