Чиқиндихонадан чиққан миллионлик соатлар

Францияда турмуш қимматлигига қарши бошланган ва бутун мамлакат бўйлаб талончилик ҳодисаларига айланиб кетган норозилик намойишларидан сўнг кўчалардан олинган тасвирлар одамларни ҳайратда қолдирди. Бир ватандош чиқинди қутиси ёнига ташлаб кетилган қутилар орасидан ҳужжатлари билан бирга Rolex соатини топиб олди. Ҳашаматли соатнинг қиймати 19 минг еврогача етиши мумкинлиги маълум қилинди.

Францияда ўтказилган намойишлардан сўнг, айниқса, Париж ва бошқа кўплаб шаҳарларда талон-торож қилинган дўконлар тасвирлари ижтимоий тармоқларда тарқалди.

Ижтимоий тармоқларда тарқалган видеода бир киши чиқинди қутиси ёнида қолдирилган қутилар орасидан Rolex маркали соатларни топиб олгани акс этган.

Қути ичида соат билан бирга сертификат ва турли ҳужжатлар ҳам бўлган.

Видеодаги соат Rolex’нинг GMT-Master II сериясидаги пўлат корпусли моделларига ўхшайди. Бу сериядаги соатларнинг сотув нархи модели ва ҳолатига қараб 17 минг евродан 19 минг еврогача боради.

Бироқ тасвирлардаги соатнинг асли (оригинал) ёки сохта экани, кимга тегишлилиги ва талон-торож қилинган дўконлардан олиб чиқилган-чиқилмагани ҳозирча номаълум.

Мамлакатда 17 октябрда бошланган зўравонлик ҳодисалари Париж, Марсель, Лион, Бордо, Ницца ва бошқа шаҳарларга тарқалди.

Намойишлар чоғида ҳашаматли бутиклар билан бир қаторда супермаркетлар, дорихоналар, электроника ва кийим-кечак дўконлари ҳам талон-торож қилинди.

Франциянинг Courrier International нашри хабарига кўра, Париждаги электроника дўкони эгаси Натан Мимун тахминан 70 минг евролик маҳсулотлари ўғирлаб кетилганини маълум қилди.

Мимун Wall Street Journal нашрига берган баёнотида: “Молиявий жиҳатдан бу чинакам фожиа. Бунинг остидан қандай чиқиб кетишни билмаяпман”, деди.

Яна бир дўкон рафлари тўлиқ бўшатиб кетилганини айтган Эрве Дени эса: “Ҳамма нарсани олиб кетишибди!” дея фикр билдирди.

Бошқа томондан, намойишлар пайтида дўконлардан ўғирлангани даъво қилинган маҳсулотлар кўчаларда сотувга қўйилди. Тротуарларга ёйилган сумкалар, пойабзаллар ва кийим-кечаклар ташкил этилган расталарда сотилмоқда.

АҚШ президенти Дональд Трамп ҳам Франциядаги воқеалар юзасидан баёнот берди.

Трамп намойишлар ва зўравонлик ҳодисалари миграция сиёсати билан боғлиқлигини илгари суриб, Франция президенти Эммануэль Макронни нишонга олди.

“Макрон билан илк бор кўришганимда: 'Чегараларингизни ёпинг, акс ҳолда мамлакатингизни вайрон қиласиз', деган эдим”, деган Трамп Франция ўз чегараларини ёпмаганини таъкидлади. Трамп, шунингдек: “Париж жуда яқин орада мусулмонлар шаҳрига айланади”, деган даъвони илгари сурди.

Бутун мамлакат бўйлаб юз берган зўравонликлардан сўнг Франция бош вазири Себастьен Лекорню ҳаракатга келди.

Франциянинг BFMTV телеканали хабарига кўра, Лекорню Лион ва айрим шаҳарларда қисман комендантлик соати жорий этиш бўйича префектларга топшириқ берган.

Лилль, Дуэ ва Ваттиньи шаҳарларининг муайян ҳудудларида 19 ва 20 октябрь кечалари соат 20:00 дан 06:00 гача комендантлик соати жорий этиш қарори қабул қилинди.

Намойишларда 2 минг 400 га яқин киши қўлга олинган бўлса, камида 1 500 та тадбиркорлик субъекти талон-торож қилингани ҳақида маълумот берилди.