Францияда мактаб ўқувчиларининг норозилик намойишлари

Пайшанба куни талабалар ҳам қўшилган мактаб ўқувчиларининг норозилик намойишлари Лилль, Париж ва Нант шаҳарларида кучайди. Тартибсизликлар, ўт қўйиш ва тўқнашувлар содир бўлгани хабар қилинмоқда. Бош вазир Себастьен Лекорню инқироз штабини чақирди.

Францияда лицейлардаги норозилик намойишлари миқёси кенгаймоқда: пайшанба куни уларга таълим муассасаларини молиялаштиришни оширишни талаб қилаётган талабалар қўшилди. Полиция маълумотларига кўра, эрталаб 340 та акция ўтказилган, 169 та лицей тўсиб қўйилган, Иль-де-Франс минтақасида 200 дан ортиқ муассасада дарслар барбод бўлган, уларнинг тахминан 50 тасида талон-торож, тўқнашувлар ва ёнғинлар юз берган.

Айниқса, Лилль ва Парижда вазият ўта кескинлашган бўлиб, у ерда ўқувчиларнинг полиция билан тўқнашувлари қайд этилган, кўздан ёш оқизувчи газ қўлланилган. Ҳафта бошидан бери бир неча юз киши, асосан вояга етмаганлар ҳибсга олинган.

Миллий полициянинг бош инспекцияси (IGPN) тўсиб қўйилган вақтда олинган жароҳатлар юзасидан учта иш қўзғатди. Тур шаҳрида бошидан жароҳат олган лицей ўқувчиси шифохонага ётқизилди; прокурорнинг сўзларига кўра, жароҳатнинг табиати LBD травматик қуроли снаряди текканини кўрсатмоқда.

Нант шаҳрида Нельсон Мандела номидаги лицей фойесида ёнғин чиқиб, кириш қисми ва фасадининг бир қисми зарар кўрди. Маъмуриятнинг билдиришича, ёнғин қасддан содир этилган, сабаблари аниқланмоқда. Жабрланганлар йўқ, муассаса бир неча кунга ёпилган.

Марселда эрталаб жиддий ҳодисалар қайд этилди: Виктор Гюго номидаги лицей ходимлари устига бензин сепиб юборилган, бошқа бир таълим муассасасида ёшлар ўт ўчириш машинасига ҳужум қилиб, автомобилни ёқиб юборишган.

Талабалар ташкилотлари 30 га яқин кампус тўсиб қўйилганини хабар қилмоқда.

Ўқувчилар молиялаштиришни кўпайтиришни, дарсларда қатнашмаётган ўқитувчиларни алмаштиришни ва ўқитиш шароитларини яхшилашни талаб қилмоқдалар. Париж минтақасида ўқитувчиларни алмаштириш муаммолари сабабли бошланган ҳаракат бошқа минтақалар ва коллежларга ҳам тарқалди.

Бош вазир Себастьен Лекорню Ички ишлар вазирлигида идоралараро инқироз штабини чақирди ва вазирларга вазиятни бошқаришга ресурс тўплаш учун сафарларини ўзгартиришни топширди. Le Figaro нашрининг хабар беришича, Жеральд Дарманен "жиноий ҳуқуқ доирасида кескин чора кўрилишини" таъминлаш учун 36 нафар бош прокурорни зудлик билан йиғади.

Бош вазир деворияти махсус хизматлар тўсиб қўйилларда "Бўйсунмаган Франция" партияси ва унинг ўта сўл муҳитдаги проксиларининг манёврларини" кўраётганини хабар қилмоқда.

Ўта ўнг қанотдаги "Миллий бирлашув" сиёсий партияси етакчиси Марин Ле Пен Жан-Люк Меланшон партиясини норозилик намойишларини қизитиб юборишда айблаб, булар "профессионал фаоллар томонидан ташкил этилган ва "Бўйсунмаган Франция" партияси депутатлари томонидан назорат қилинадиган тартибсизликлар" эканлигини айтди.