241 кишига қабр бўлган самолётдан фақатгина у тирик чиқди

Июнь ойида Ҳиндистондан Буюк Британияга учаётган "Air India" самолётининг қулаши натижасида 241 киши ҳалок бўлган бир пайтда, 39 ёшли Вишвашкмар Рамеш фалокатдан омон қолган ягона инсон бўлди. Акасини авиаҳалокатда йўқотган Рамеш: "Ўзимни дунёдаги энг омадли инсон ҳис қиляпман, лекин ҳолатим тушкун", дея бошдан кечирган оғир руҳий изтиробларини сўзлаб берди.

Ўтган июнь ойида Ҳиндистондан Буюк Британия пойтахти Лондонга парвоз қилаётган "Air India" самолёти, парвоздан сўнг содир бўлган фожиали ҳалокат натижасида қулаган эди. Ҳалокатда 241 киши ҳалок бўлди, 39 ёшли Вишвашкмар Рамеш эса омон қолган ягона йўловчи бўлди.

Ҳалокатдан сўнг дарҳол олинган тасвирларда, олов ичидаги "Boeing 787" қолдиқларидан Рамешнинг ўзи юриб кетаётгани кўринган. Рамеш ўзини ўриндиғидан ечиб, самолёт фюзеляжидаги (танасидаги) тешикдан ташқарига судралиб чиққанини сўзлаб берди.

Би-би-сига берган баёнотида Рамеш бошдан кечирган шок ва руҳий изтиробни тилга олиб: "Ўзимни дунёдаги энг омадли инсон ҳис қиляпман, лекин жисмонан ва руҳан тушкун ҳолатдаман", деди.

Рамеш самолётда ўзидан бир неча ўриндиқ нарида ўтирган акаси Ажайни йўқотганини ва бу йўқотиш унинг учун таърифлаб бўлмас даражадаги дард эканлигини изҳор этди. Акаси ҳақида гапирар экан, кўзёшларини тия олмаган Рамеш: "Фақат мен қутулдим, ҳали ҳам ишона олмаяпман. Лекин акамни йўқотдим. У менинг суянчим эди, доим ёнимда эди", деди.

Ҳалокатдан сўнг Англияга қайтган Рамеш, ҳали ҳам ҳалокатдан кейинги стресс бузилиши билан курашаётганини, хотини ва 4 ёшли ўғли билан мулоқот қилишга қийналаётганини очиқлади.

Рамеш бошдан кечирган руҳий изтиробни шу сўзлар билан тушунтирди:

"Ҳалокатдан сўнг ҳамма нарса жуда қийинлашди. Жисмонан, руҳий жиҳатдан... Оилам ҳам жуда таъсирланди. Онам тўрт ойдан бери ҳар куни эшик олдида ўтирибди, ҳеч ким билан гаплашмайди. Мен ҳам ҳеч ким билан гаплашишни истамайман. Ҳар кеча ҳалокат ҳақида ўйлайман, хаёлимдан кетмайди. Азоб чекяпман."