Урушни тўхтата олмади, тинчликни қутқара оладими?

Трамп “АҚШнинг янги урушга буйруқ бермаган ягона президенти” сифатида мақтанишни хуш кўрар ва Нобель тинчлик мукофотини олиш учун анча тиришар эди. Натижа эса – Нетаняхунинг етагида урушга кириш мукофоти: “Исроил давлат нишони!..”

Дональд Трампнинг Нобель тинчлик мукофотини олишга қанчалик иштиёқ билан интилганини, қандай чирпанганини унутган бўлмасангиз керак... Ҳатто ушбу мукофотни олган Венесуэла мухолифати етакчиси Мария Корина Мачадонинг пора тариқасидаги лавҳани унга тақдим этишидан ҳам жуда мамнун бўлган эди! Бу даражада тинчликсевар (!) бўлган Трамп, сионистик босимлар натижасида Нетаняхунинг айтганига кириб, Эрон ботқоғига ёмон ботиб қолди!.. Ваҳоланки, ҳужум буйруғини беришдан бир кун олдин, яъни 27 февралда Америка давлатининг ўн саккизта алоҳида разведка хизмати бирлаштирилган ҳисоботи билан Эрондан АҚШга нисбатан ҳеч қандай таҳдид ва хавф йўқлигини қайд этган эди. Ушбу муҳим ҳисобот унга тақдим этилган бўлса-да, Трамп – катта эҳтимол билан Эпштейн ҳужжатларидаги машмашалар сабабли қўлга тушиб қолган – сионистларнинг шантажига бўйин эгиб, мақсади ҳам номаълум бўлган урушга кириб кетди...

Сўнгги бир ойдан бери тинимсиз таҳдид ва йўқ қилиш тилида гапираётган АҚШ Президенти, бир неча кундан бери тинчлик ва музокара сўзларини маҳкам тутмоқда. Энди жавоб кутаётган асосий савол шу: урушнинг олдини ололмаган Трамп тинчликни қутқара оладими?.. Бу ҳеч ҳам осон эмас!.. Чунки урушнинг чўзилишини истаётган Исроил, ҳар бир қадамда тинчликка борадиган йўлни тўсиш учун қўлидан келган барча ишни қилмоқда. Исроил ҳамма жойда (масалан, Ғазо ва Ливанда) қилганидек, уруш қоидаларидан ташқари, инсониятга қарши жиноят даражасидаги қилмишларни содир этмоқда. Мактаб ва шифохона каби биноларни бепарволарча бомбалаётган сионист Исроил, Теҳрон халқини ёппасига заҳарлашга қаратилган ҳужумни ҳам амалга оширди. Шаҳар ичидаги ёнилғи омборларини нишонга олган Исроил, Эроннинг энг муҳим табиий газ ишлаб чиқариш иншоотларини ҳам бомбалади. Эрон ҳам бунга жавобан Қатарнинг энг йирик газ иншоотларига ракеталар билан ўт очди. Натижада уруш янада кенгайди... Бунинг устига Трамп таҳдидларни бошлади! Бироқ Исроилнинг ҳужумларини хаспўшлашга ҳаракат қилди. Унинг фикрича, агар Эрон Қатарнинг газ иншоотларига ҳужум қилмаса, Исроил ҳам энди Эроннинг электростанцияларига ҳужум қилмас эди... Лекин Трампнинг гаплари ҳавода қолди ва Исроилнинг шунга ўхшаш ҳужумлари ҳеч тўхтамади. Ташаббусни Исроилга бой бериб қўйган АҚШ Президентининг бундай шароитда тинчлик муҳитини таъминлаши мумкин эмасдек кўринмоқда.

Бу шуни англатадики, Исроил АҚШнинг ҳарбий кучини ўз мақсадлари йўлида охиригача ишлатишда давом этади... Трамп ақлдан ташқари бир тарзда бошлаган урушини тўхтатиш учун қанчалик чирпанса-да, бу осон бўлмайди. Бу ерда машҳур иборани эслаш ўринли: “Урушни бошлаш осон, лекин тўхтатиш қийин...”

Трамп Эронни тинчлик шартларига мажбурлаш учун тинимсиз ҳарбий куч тўпламоқда. Шу йўл билан Эронни тўқнашувдан қайтармоқчи бўляпти. Америка сўнгги олтмиш йил ичида кирган барча урушларида жуда юқори ўт очиш кучи ва самарали ўқ-дорилардан фойдаланди. Вьетнамда беш юз минг аскар ишлатди. Шунингдек, етти мингта самолёт ва вертолёт урушга жалб қилинди. Аммо натижа мағлубият бўлди. Биринчи Кўрфаз урушида (1992) – саккиз йиллик Эрон урушидан чарчаган Ироқ армиясига қарши – 43 давлатдан иборат коалициянинг даҳшатли кучи билан ҳужум қилди. Шунингдек, 2003 йилдаги Ироқ истилосида ҳаддан ташқари катта куч ишлатди. 2001 йилда бошлаган Афғонистон урушида тинч аҳолига қарши ҳам энг даҳшатли қуролларни қўллашдан тортинмади... Буларнинг барчаси АҚШнинг ваҳший ўтмиши ҳужжатларидир. Бироқ бу ваҳшийлик ғалаба келтирмаяпти. Америка кирган жойларини ёқиб-йиқади, аммо охирида тумтарақай бўлиб чекинади. Эронда ҳам худди шундай оқибатдан қутула олмайди. “Янчиб ўтамиз...” деб лоф урган Эрон урушида Трамп Ҳурмуз бўғозини очиқ тутиш учун ундан-бундан ёрдам сўраб ялинмоқда. Ҳаттоки, энг катта рақиби Хитойдан ҳам ёрдам сўради!.. Дунёнинг энг йирик уруш машинаси ярим асрдан бери эмбарголар остида қийналаётган Эрон билан олишишда довдираб қолмоқда. Хуллас, АҚШ ва Трампнинг обрўсига қаттиқ путур етди!

Тарқалаётган хабарларга қараганда, Трамп яқинда Исроилга бориб, унга бериладиган давлат нишонини олармиш... Нобель тинчлик мукофоти ўрнига сионист давлат берадиган нишонга рози бўлиш! Бу ҳам Трампнинг аслиятини кўрсатади, албатта. Лекин бу ҳайратланарли эмас. Албатта, бунинг драматик натижалари бўлади. АҚШнинг гегемонлик кучи кутилганидан тезроқ тугар экан, дунё бутунлай бошқача ҳарбий ва сиёсий мувозанатлар билан шаклланади... Ва катта эҳтимол билан АҚШ ичида ҳам жиддий ҳисоб-китоблар бошланади. Сионистларга сўзсиз берилган ёрдам мутлақо таҳлил қилинади. Бу ҳисоб-китоб демократлар ва республикачилар ўртасидаги оддий курашдан кўра анча чуқурроқ форматда кечади. Ва, албатта, биринчи навбатда Эпштейн ҳужжатлари каби кўплаб бошқа омиллар ҳам ишга тушади. Америка катта ҳисоб-китоблар ичига киради-ю, Исроилда ҳамма нарса тинч қоладими? Қотил Нетаняхунинг суд олдида жавоб беришдан қутулиш учун бошлаган саргузашти сионист давлатни кутилганидан ҳам ёмонроқ боши берк кўчага солиб қўйгани аниқ!.. Бунинг товонини ҳамма ўз улушига яраша тўлайди. Уруш ва инсониятга қарши жиноят содир этиб, ўн минглаб одамларнинг қонига зомин бўлган қотиллар тўдаси, муҳаққақ суратда, халқаро ҳуқуқ доирасида жавобгарликка тортилади...

Баъзиларингизнинг “Қани ўша халқаро ҳуқуқ?” деб сўраганингизни эшитяпман. Тўғри. Лекин бу доим шундай қолмайди. Тонг отмасдан нималар бўлмайди дейсиз... Мазлумнинг оҳи қулатар шоҳни!.. Бугунги дунё тартибининг бузилгани сабабли Трамп ва Нетаняху юзларида Намруд ва Фиръавн кибри билан иржайиб, бепарволарча ҳар қандай қароқчиликни қилишяпти. Лекин ишнинг охирига қараш керак... Бугуннинг эртаси ҳам бор!