Миллионер «бечора»лар

 Одамзот қачон тўяди? Темир сандиқдаги пуллари тўлиб-тошгандами? Бир нечта данғиллама иморатга, қўш-қўш автомобилларга эга бўлгандами? Ёки бўлмаса, доимий тушуми бор «ёғли иш» топгандами? Ўзимизни қийнамайлик. Рўйхатни яна юз бетга давом эттирсак ҳам тўйдим деганини тополмаймиз.

Биз талашиб-тортишаётган дунё матоҳлари шунчалик қайғуришимизга арзирмикан ўзи? Бугун ҳамма нарсаси керагидан зиёд бўла туриб ҳам, йўқман деб зорланадиган «бечора» кўринишидаги тўқларни кўриб ҳайратланасан киши. Шукронани унутган бундай кишиларга ачинасан ҳам.

Қаҳрамонимиз аслида ёмон одам эмас. Ибратли хонадон фарзанди, оила бошлиғи, меҳрибон ота, уқувли тадбиркор. Маромида ривож топаётган ишлари ярим йилдан бери сустлашгандек.

Ўзининг тили билан айтганда: «топгани ҳеч нимага етмаяпти». Даромадининг чўғи камайганмиш. Лекин бизнингча, аҳволи ҳар ҳолда ёмон эмас: бир нечта кўчмас мулк эгаси бўлса, фаолият тури ҳам кенг. Бири бўлмаса, иккинчисидан тушум бўлиб турибди. Ўша тушум (оила аъзолари ва уй хизматчилари билан ҳисоблаганда) ўн беш кишининг қорнини тўйдириб, эгнини бутлаб, яна ортиб ҳам қолаяпти. Аммо қаҳрамонимизнинг юзидан алам ва умидсизлик аримайди. Фарзандлари соғ, оиласи тинч. Лекин бу «бечора» ўзининг тинчлигини билмайди. «Ишларим ўзим истагандек юришмаяпти», дейди изтироб билан. Қўйиб берсангиз, бунинг учун ўзини еб битиргудек...

 Биродар, қўлингизда борига, берганига шукр қилсангиз-чи, дейсиз. Йўқ, у сизни эшитмайди, бирор кун пул келмаса очдан ўлиб қоладигандек саросимага тушади. Шунақаларни кўрганда «Олтин девор» спектаклидаги Ғани Аъзамов талқин этган Мулла Мўминнинг «Олтинлар!? Қани олтинлар!? Тош! Тош! Тош!» деб эсдан оғиб қолиш даражасига бориб етгани кўз олдимга келаверади. Бойлик, ортиқча мол-дунё илинжида васвасага тушиш хайрли оқибатларга олиб келмаслиги тайин. Бир ишим юришмаса, иккинчиси бўлаяптику, деб шукр қилмаслик, ўзида борига қаноат қилмаслик маънавий қашшоқликнинг энг хунук кўриниши эмасми? Қўша-қўша уй-жой, мол-мулк жамғарганига қарамай, набирасининг набирасига тилла зирак олишга маблағи етмаётганидан куюнадиган кишини соғ деб бўлармикан? Ота-онаси, ака-укалари бўла туриб, «ғирт етимман», деб йиғлаётган мастнинг аҳволига ўхшаш-а, бу ҳолат.

Еб тўймаслик, очкўзлик васвасаси, фақат даромад ҳақида ўйлаш жуда кўпчиликни ҳаётнинг ҳақиқий лаззатларидан бебаҳра қилиб қўяётир. Қаноатсизлик, ношукрлик оқибатида ҳақиқатдан ҳам ҳамма ишларингиз орқага кетишидан ёинки бирор кўнгилсизликка учрашдан қўрқмайсизми, деб сўрагимиз келади шунақа «бечора»лардан.

Муҳими - кўп пул топиш эмас!

Жим Роннинг «Ақл витаминлари» китобида шундай оқилона фикрларни ўқиймиз:

«Асосий калит ўзингиз. Қандай қилиб сиз юқори даромад даражасига эришдингиз деган саволга дўстим: «Мен юқори даражадаги инсон бўлдим. Ўз устингизда ишланг», деди.

...Ачинарлиси шуки, кишининг миллиони бўлса-ю, миллионер бўла олмаса! Даромадингиз ўсиб кетди, ўзингиз эса йўқ. Шунинг учун ишга киришишда «Неча пул оламан?» эмас «Ким бўламан?» деб сўранг. Шахс ўсиши натижасида олинмаган нарсани сақлаш қийин. Гап шундаки, даромад ўсиб, ўзингиз ўсмаганингиз туфайли бу пуллар осонгина қўлингиздан чиқиб кетиши мумкин. Муҳими миллион эмас, шу миллион топиш жараёнида сизнинг ким бўлиб етишганингиз аҳамиятлидир.

...Пулга юрак ва қалбни сотиб олиб бўлмайди. У миллион доллардан кўра қимматлироқ. Агар сизда миллион доллар бўлса-ю, юрак ва қалб бўлмаса, сиз яшай олмайсиз.

...Кўп топишнинг энг яхши усули - олдин топган нарсангизга шукр қилиш. Шукроналик янги фикрлар ва имкониятлар эшигини очиб беради».

«Бечора»ларга ёрдам беринг!

Шукр қилмаслик, ҳамма нарсаси бўла туриб ҳам ҳаётдан, одамлардан норози бўлиш қандай оқибатларга олиб келади? Туну-кун пул ишқида ёнадиган кимсаларга ёрдам бериш мумкинми? Бу саволларга психолог М.Жумабоева қуйидагича жавоб беради:

«Ҳар доим иши яхши, топиши дуруст бўлган инсон ногаҳон бирор қийинчилик кўрса, тушкунликка тушиб қолиши мумкин. Носоғлом фикрлаши унинг ишларини янада орқага суради. Бундай кишилар одамови, жиззаки бўлиб қоладилар. Яқинларидан узоқлашиб, ҳаётга қизиқишлари камайгандек бўлади. Улардаги бу ҳолат узоқ давом этса, жиддий касалликка сабаб бўлиши ҳам мумкин. Айримлар бу ҳолатдан яқинлари ёрдамида чиқиб кетса, айримлар ҳар-хил дуохон, кинначилардан нажот истайдилар. Бироқ ушбу ҳолатда дуохонлар ёрдам бера олмайди. Энг яхши йўл - оила аъзолари меҳри билан «даволаш». Яъни, борди-ю, сизнинг бирор яқинингизда шундай ҳол кузатилса, унга аввалгидан ҳам кўра кўпроқ эътиборли бўлинг. Унинг пули бор-йўқлигидан қатъий назар, сизга азиз ва керакли инсонлигини таъкидлашдан эринманг. Моддият келиб-кетадиган ўткинчи нарсалигини, дунёда пул билан ўлчаб бўлмайдиган мўътабар ва бебаҳо нарсалар борлигини эслатинг...».

Зуҳра РЎЗИЕВА