Марокаш – жаҳон ёшлар футболи чемпиони!

Аргентина терма жамоаси иштирок этган жаҳон ёшлар чемпионати финали кутилмаган натижа билан якунланди.

20 октябрь куни кечаси ФИФА томонидан ўтказилган ёшлар ўртасидаги жаҳон чемпионати финал баҳси бўлиб ўтди. Асосий беллашувда Аргентина ва Марокашнинг 20 ёшгача бўлган терма жамоалари майдонга тушди.

Учрашув 0:2 ҳисобида марокашликлар фойдасига якунланди. Ҳар икки гол ҳам биринчи бўлимда Яссир Забирий томонидан киритилди — у 12- ва 29-дақиқаларда рақиб дарвозасини ишғол этди.

Бу ғалаба Марокаш учун тарихдаги илк жаҳон чемпионлиги бўлди. Ўтган мусобақанинг ғолиби бўлган Уругвай терма жамоаси бу сафар ҳатто 1/8 финалга ҳам чиқа олмади.

Финал якунларига кўра, мусобақанинг энг яхши ўйинчиси деб француз шаҳарларидан бири — Алесда туғилган марокашлик вингер Отман Маамма топилди. У чемпионатнинг энг яхши ўйинчиси совринини қўлга киритди.

Шунингдек, финалда дубль муаллифи Яссир Забирий ҳам турнирининг энг яхши тўпурари сифатида эътироф этилди.

Аввалроқ хабар қилинганидек, Марокаш миллий терма жамоаси тарихда миллий жамоалар орасида энг кўп кетма-кет ғалабалар сони бўйича янги рекорд ўрнатди.