Португалия Евро-2016 чемпиони!

Кеча 10 июль куни Парижда мезбон Франция терма жамоаси билан Португалия терма жамоаси ўртасида финал учрашуви бўлиб ўтди. Португалия терма жамоаси Евро-2016 чемпионатининг финалида Франция устидан 1:0 ҳисобда ғалаба қозонди. Ягона гол муаллифи Ренату Санчеш ўрнига тушган ҳужумчи Эдер бўлди. Эдер 109-дақиқада Франция терма жамоаси дарвозасига олисдан гол йўллади.

Шуни таъкидлаш керакки, матчнинг 8-дақиқасида Португалия терма жамоаси капитани Криштиано Роналду Франция ҳужумчиси Димитр Пайет билан тўқнашувда тиззасидан жароҳат олди. 25-дақиқада у Рикарду Куарежмага алмаштирилди.

Португалия ўз тарихида илк бор Европа чемпиони бўлди. Бунгача терма жамоанинг кўрсатган энг юқори натижаси 2004 йил Европа чемпионатига мезбонлик қилганида финалгача етиб келгани эди. Эслатиб ўтамиз 2004 йили Португалия терма жамоаси финалда Греция терма жамоасига ўйинни бой берганди.

Шуниси қизиқки, Рикарду Сантош жамоаси турнирда асосий вақтда фақат битта, яъни яримфиналда Уэльс устидан 2:0 ҳисобда қозонилган ғалаба орқали чемпионликка етиб келди. Қолган ўйинларда асосий вақт дуранг билан тугаган.

Португалия сўнгги бор Франция терма жамоасини 1975 йили ўртоқлик учрашувида мағлуб этганди. Бундан кейинги 10 та матч французларнинг ғалабаси билан якунланган.

“A Bola” нашри хабарига кўра, Португалия терма жамоаси ўйинчилари 275 минг евродан мукофот пули олишади. Франция терма жамоаси футболчилари ғалаба қозонганида 300 минг евродан олишар эди. Ушбу сумма мамлакат президенти Франсуа Олланд томонидан эълон қилинган эди.

Португалия футбол федерацияси турнирда ғалаба қозонганидан кейин УЕФАдан 25,5 миллион евро олади. Финалда мағлуб бўлган французлар эса 2 миллион кам олади. Шу тариқа, Португалия 25,5 миллион евро, Франция - 23,5 миллион евро.Яримфиналчилар: Германия - 18,5 миллион евро, Уэльс - 18 миллион евро. Чорак финалчилар: Польша - 14,5 миллион евро, Бельгия, Исландия, Италия - 14 миллион евродан. 1/8 финал иштирокчилари: Хорватия - 12 миллион евро, Венгрия, Англия, Испания, Швейцария - 11,5 миллион евродан, Словакия ва Ирландия - 11 миллион евродан, Шимолий Ирландия - 10,5 миллион евро олди.

1960 йили 10 июль куни бундан роппа-роса 56 йил муқаддам Европа чемпионатининг биринчи финали (Европа миллатлари кубоги) бўлиб ўтганди. Ўшанда финалда собиқ СССР Югославияни 2:1 ҳисобда мағлуб этганди. Финал ўйини Францияда Парижнинг “Parc des Princes” стадионида бўлиб ўтганди.

Кеча финал матчи ўтказилган “Stade de France” стадионида бешинчи бор йирик халқаро турнир финали ўтказилди. 1998йили бу ерда жаҳон чемпионати финали (Бразилия – Франция, 0:3), 2000 йили – чемпионлар лигаси финали (“РеалМадрид”-“Валенсия”, 3:0), 2003 йили – конфедерациялар кубоги (Камерун – Франция, 0:1), 2006 году – чемпионлар лигаси финали(“Барселона” – “Арсенал”, 2:1.) ўтказилган.