Қирғизистонда ўзбек газетаси қайта чиқмоқда

Қирғизистонда ўзбек тилидаги “Ахборот” газетаси қайта чоп этила бошлади.

“Ахборот” газетаси етти йил ўтиб, ўлканинг жанубидаги Ўш шаҳрида янгидан чоп этилиб, тарқатила бошлагани маълум қилинди.

Ўзбек газетасининг янги муҳаррири Барно Исақова газета жорий йил сентябрь ойидан бошлаб чоп этила бошлаганлигини айтди. Очилиш маросими ўтган ҳафта Бобир театри биносида бўлиб ўтди. Ҳозирги вақтда газетада ўндан ортиқ журналист фаолият кўрсатмоқда.

Исақова “Биз одамларнинг кундалик ҳаётдаги муаммо, янгиликлари ҳақида мақолалар ёзамиз. Материалларимиз жуда қизиқарли. Эмигрантларнинг муаммоларини ҳам қаламга оламиз” деди.

“Ахборот” газетаси 2006 йили қурилган ва тўрт йил давомида чоп этилганди. 2010 йили юз берган қирғиз-ўзбек тўқнашувидан кейин газета бекитилганди. Жалолобод ва Ўшда ўзбек тилида чоп этиладиган “Мезон” ва “ДДД” газеталари эса ўз фаолиятини тўхтатмаганди.