Ўзбекистон халқ артисти Лутфулла Саъдуллаев вафот этди

Ўзбек театр ва кино санъатининг атоқли вакили, Ўзбекистон халқ артисти Лутфулла Саъдуллаев 10 апрель куни 81 ёшида вафот этди.

Унинг қизи, актриса Муқаддас Саъдуллаева ижтимоий тармоқдаги саҳифасида отаси вафоти ҳақида хабар берган.

Актёр сўнгги йилларда оғир хасталикка чалинган, ўтган ҳафтада шифохонанинг жонлантириш бўлимига оғир аҳволда жойлаштирилганди.

Кейинчалик актёрнинг аҳволи оғирлашиб, комага тушиб қолгани ҳақида хабарлар тарқалганди.

Лутфулла Саъдуллаев 1940 йил 18 декабрда Тошкент шаҳрида туғилган. 1965 йилда Театр ва рассомчилик институтини тугатган. 1963 йилдан кинода рол ижро эта бошлаган. 1968 йилда ҳамкасби Гулчеҳра Саъдуллаевага уйланган.

1963–2007 йилларда Абдулла Қаҳҳор номидаги Сатира театрида фаолият кўрсатган. 2008 йилдан Республика ёш томошабинлар театрида ишлай бошлаган.

Фаолияти давомида тахминан 200 га яқин спектаклларда роллар ижро этган. Кино ва видеофильмлар, телевизион миниатюралар дастурида ижро этган роллари эса 500 дан ошади.

Ўзбек кинотомошабини уни «Баҳор қайтмайди» видеофильмидаги Алимардон Тўраев, «Одам бўлиш қийин»даги Абдулла, «Шайтанат» сериалидаги Қилич Сулаймонов, «Оталар сўзи»даги иштироки, шунингдек «Осмондаги болалар», «Фотима ва Зуҳра» ва «Цунами» каби фильмларидаги роллари орқали эслаб қолади.

kun.uz дан олинди.