АҚШ ва Канада келишди

Канада Бош вазири Трюдо ва АҚШ Президенти Трамп келишувга эришди. Томонларнинг баёнотларига кўра, АҚШнинг Канада учун жорий қилган “импортга 25%лик қўшимча божхона тўлови” қарори камида 30 кунга тўхтатилди.

АҚШ Президенти Дональд Трамп 1 февралда имзолаган қарор билан Канада ва Мексикадан олиб кириладиган маҳсулотларга 25%, Хитойдан келадиган маҳсулотларга эса 10% қўшимча божхона тўлови жорий этган эди. Бу масала дунёда муҳокама мавзуси бўлган бир вақтда, Трампдан яна бир янги қадам ташланди.

Канада Бош вазири Жастин Трюдо ўзининг X (илгари Twitter деб аталган) ижтимоий тармоғида шу мавзудаги пост билан бўлишди. Трюдо, чегара хавфсизлигини оширишга қаратилган чоралар эвазига АҚШнинг мамлакатга жорий қилган 25%лик божхона тўлови камида 30 кунга тўхтатилишини маълум қилди.

АҚШ Президенти Дональд Трамп билан яхши учрашув ўтказганини айтган Трюдо, Канада 1,3 миллиард долларлик чегара режасини амалга оширишини таъкидлади.

Трюдо, чегарани янги вертолётлар, технология ва ходимлар билан кучайтиришларини, Америка ҳамкорлари билан мувофиқлашувни ва фентанил оқимини тўхтатиш учун ресурсларни оширишларини билдирди.

Чегарани ҳимоя қилиш учун тахминан 10 минг нафар ходим ишлаётгани ва ишлашини таъкидлаган Трюдо, шунингдек, Канада картелларни террорчи сифатида рўйхатга олишларини, чегарада 24 соат назоратни таъминлашларини, уюшган жиноятчилик, фентанил ва пул ювишга қарши курашиш учун "Канада-АҚШ қўшма ҳаракат гуруҳи"ни бошлашларини айтди.

Трюдо уюшган жиноятчилик ва фентанил бўйича янги разведка йўриқномасини имзолаганини ва буни 200 миллион доллар билан қўллаб-қувватлашларини таъкидлади. “Биргаликда ишлаган ҳолда, божхона тўловлари қонуни камида 30 кунга тўхтатилади”, деди у.

АҚШ Президенти Трамп Канада Бош вазири Жастин Трюдо билан суҳбатлашганидан сўнг, божхона тўловлари бўйича Truth Social ижтимоий тармоғида билдириш берди. Трамп, Канада АҚШнинг хавфсиз шимолий чегарага эга бўлишини таъминлаш ва мамлакатга фентанил каби ўлимга олиб келувчи наркотиклар оқимини тўхтатишни қабул қилганини таъкидлади.

Трамп ўз баёнотида шундай деди: “Президент сифатида барча америкаликларнинг хавфсизлигини таъминлаш менинг масъулиятим ва мен буни амалга оширяпман. Бу дастлабки натижадан жуда мамнунман ва шанба куни эълон қилинган тарифлар Канада билан якуний иқтисодий келишув тузилиш ёки тузилмаслигини кўриш учун 30 кунлик муддатга тўхтатилади”.