«Челси» клублар ўртасидаги Жаҳон чемпионатида ғолиб бўлди

Англиянинг «Челси» жамоаси АҚШнинг Нью-Йорк шаҳрида бўлиб ўтган финалда Франция чемпиони ҳамда амалдаги чемпионлар лигаси ғолиби «ПСЖ» устидан 3:0 ҳисобида зафар қучиб, Клублар ўртасидаги Жаҳон чемпионатида ғолибликни қўлга киритди.

Учрашувнинг қаҳрамони — «Челси» яримҳимоячиси Коул Палмер бўлди. У икки гол муаллифига айланиб, финалнинг энг яхши ўйинчиси деб эълон қилинди.

Бу мавсумда «Челси» Европа Конференциялар лигасида ҳам ғалаба қозонган эди. Франциянинг «ПСЖ» жамоаси эса Чемпионлар лигаси чемпиони сифатида Жаҳон чемпионатида иштирок этиш ҳуқуқини қўлга киритган.

Лондонликлар учун бу — Клублар ўртасидаги Жаҳон чемпионатидаги иккинчи ғалаба. Улар аввалги бор 2021 йилда, клубга Роман Абрамович раҳбарлик қилган пайтда ҳам ушбу мусобақани ютган эди.

Бу йилги чемпионат ФИФА томонидан илк бор 32 клуб иштирокида ташкил этилди. У АҚШда 14 июндан 13 июлгача бўлиб ўтди. Турнирда ҳар бир қитъадан кучли жамоалар қатнашди.

Плей-офф босқичида «Челси» Бразилиянинг «Палмейрас» ва «Флуминенсе» жамоаларини мағлуб этди. «ПСЖ» эса «Бавария»ни енгди ва «Реал Мадрид» устидан йирик ғалабага эришди.

Турнир ўзининг голларга бой ўйинлари, катта аудиторияси ва айрим ташкилий муаммолари билан ҳам ёдда қолди. Хусусан, айрим ўйинларда стадионга келувчилар сони паст бўлди ва об-ҳаво билан боғлиқ муаммолар юзага келди.

Мазкур ғалаба «Челси» учун тарихий аҳамият касб этади. Улар «Реал Мадрид»дан кейин иккинчи марта бу мусобақада чемпионликни қўлга киритган жамоалар қаторига қўшилди. Эслатиб ўтамиз, «Реал» Клублар ўртасидаги Жаҳон чемпионатида 5 марта ғолиб чиққан.

Финал учрашувини трибунадан шахсан АҚШ президенти Доналд Трамп ва унинг рафиқаси Мелания Трамп ҳам томоша қилди.