Туркистонда янги жамоат автобуслари йўлга қўйилди


  • 28 Август, 2025
  • 17

Бугун Туркистон шаҳрида Йўл ҳаракати ходимлари касб байрами ҳамда «Ишчи касблар йили» доирасида янги жамоат автобусларини ишга тушириш маросими бўлиб ўтди. Тадбирда шаҳар ҳокими Азимбек Пазилбекўғли иштирок этиб, соҳа ходимлари билан учрашди.

«Жолауши» масъулияти чекланган жамияти директори Раҳимжон Эркинов автопарк имкониятлари ва янги автобусларнинг афзалликлари ҳақида маълумот берди. Айни пайтда Туркистон шаҳрида 190 та автобус 21 та йўналиш бўйича хизмат кўрсатмоқда. Соҳа бўйича қарийб 300 киши меҳнат қилмоқда. Шу йилнинг охиригача қўшимча 60 одам иш билан таъминланиши кўзда тутилган.

Ҳоким соҳа ходимларини кўп йиллик самарали меҳнати учун миннатдорчилик билдиради ва уларга эсдалик медаллари топширди.

– Йиллар давомида ҳайдовчилар, техник-механиклардан тортиб диспетчер ва кондукторларгача, ҳар куни эрта тонгдан кечгача меҳнат қилиб, шаҳримиз тараққиётига ҳисса қўшмоқдасизлар, аҳолига фидокорона хизмат қилмоқдасизлар. Сизларга чуқур миннатдорчилик билдираман. Бугун автопаркимиз 16 та замонавий автобус билан тўлдирилди. Йил якунигача яна 10 та янги автобус олиб келиш режалаштирилган, – деди шаҳар ҳокими.

Янги автобуслар замонавий видеокузатув камералари, кондиционерлар, электрон билет тизими билан жиҳозланган бўлиб, ногиронлиги бўлган шахслар учун пандуслар ҳам ўрнатилган.

Маросимда Туркистон шаҳар маслиҳати раиси Ғаппар Сарсенбоев ва шаҳар полицияси бошлиғи Жасулан Қаржаубайўғли иштирок этиб, соҳа ходимларига ташаккурномалар топширди.


Бошқа мақолалар