Конгодаги кобальт конида фожиа

Конго Демократик Республикаси (КДР) жануби-шарқидаги кобальт конида кўприкнинг қулаши оқибатида 70 киши ҳаётдан кўз юмди.

Конго Демократик Республикасининг Луалаба вилоятида жойлашган мазкур конда шанба куни қулаган кўприк сув тўпланган ҳудудга тушган.

Вилоят Ички ишлар вазири Рой Каумба Маёнде ушбу ҳодисада 70 кишининг ҳалок бўлганини тасдиқлади.

Маълумот учун, КДР глобал кобальт етказиб беришнинг 70 фоизидан ортиғини таъминлайди; кобальт электр транспорт воситалари, шунингдек, кўплаб ноутбук ва мобил телефонларида қўлланиладиган аккумуляторлар учун асосий хомашё ҳисобланади.

Тахминларга кўра, мамлакатдаги улкан ноқонуний кобальт конларида 200 мингдан зиёд киши ишлайди.

Маҳаллий расмийлар кўприкнинг Луалаба вилояти пойтахти Колвезидан тахминан 42 километр жануби-шарқда жойлашган Каландо конида қулаганини маълум қилди.

Маёнде шундай деди: "Кучли ёмғир ва ер кўчиши хавфи туфайли конга кириш тақиқланган бўлишига қарамай, ноқонуний кончилар чегарани бузиб киришган."

Унинг сўзларига кўра, кончиларнинг сув билан тўла хандақдан ўтиш учун қурилган вақтинчалик кўприкка шошилишлари натижасида кўприк қулаб тушган.

Кон кооперативларини назорат қилувчи ва қўллаб-қувватловчи SAEMAPE ҳукумат агентлигининг ҳисоботида Каландо конида ҳарбий хизматчиларнинг пайдо бўлиши ваҳима келтириб чиқаргани қайд этилган.

Ҳисоботда айтилишича, кон анчадан буён ноқонуний кончилар, конни ташкил этиши керак бўлган кооперативлар ва Хитойлик инвесторларни ўз ичига олган қонуний тадбиркорлар ўртасидаги низоли объект бўлиб келган.

Ҳисоботда, кончиларнинг бир-бирининг устига босиб кетгани туфайли ўлим ва тан жароҳатлари юзага келгани билдирилган.