Хитойни ларзага солган фалокат

Хитойнинг Гонконг Махсус Маъмурий Ҳудудининг Тай По туманида тахминан 4000 киши яшайдиган комплексда чиққан ёнғин ниҳоят ўчирилди.

Гонконгда сўнгги 70 йил ичида кузатилган "энг йирик ёнғин" деб баҳоланаётган ушбу фалокатда 94 киши ҳалок бўлди. Расмийлар 11 нафари ўт ўчирувчи бўлган 76 киши жароҳатланганини билдирди.

Тахминан 4000 киши яшайдиган турар жой комплексида ёнғинни ўчириш ишлари Чоршанбадан бери давом этаётганди. Ўт ўчириш хизмати бугун эрталаб соат 10:18 да аланга "асосан ўчирилгани" ва "ишлар тугатилгани" ҳақида баёнот берди.

Расмийлар ёнғиннинг келиб чиқиш сабабини ўрганмоқда. АФПнинг хабарига кўра, комплексда таъмирлаш ишлари олиб борилган ва ўрнатилган бамбук ишқобастлар ҳамда пластик тўрлар ёнғиннинг тез тарқалишида катта рол ўйнаган бўлиши мумкин.

South China Morning Post (SCMP) газетасининг маълум қилишича, 31 қаватли 8 блокдан иборат ушбу мажмуадаги таъмирлаш ишларида банд бўлган ишчиларнинг чекиши ёнғинга сабаб бўлган бўлиши мумкин деган тахмин бор.

Гонконг Муҳандислар институти ходимлари ёнғин бинолардан бирининг пастки қаватидаги ишқобастда бошланиб, юқорига ва ичкарига тарқалганини, шамол ҳам аланга тез ёйилишига ёрдам берганини қайд этди.

Ҳозирча йўқолганларнинг аниқ сони ноаниқ. Аммо кўплаб оилалар ҳамон комплекс атрофида яқинларидан хабар кутишмоқда.

Расмийлар 300 дан ортиқ жароҳатланган борлигини, уларнинг 12 нафарининг аҳволи ўта оғир, 28 нафарининг эса оғир эканлигини билдирди.

Хавфсизлик идоралари таъмирлаш ишларини олиб борган қурилиш компаниясининг 2 нафар директори ва маслаҳатчи муҳандисни "эҳтиётсизлик оқибатида ўлимга сабабчи бўлиш" айблови билан қўлга олди. Тергов давом этмоқда.