Австралия қуролларни йиғиб олишни бошламоқда

Австралия Бош вазири Энтони Албаниз, Сидней шаҳрида 15 киши ҳалок бўлган қуролли ҳужумдан сўнг миллий «қуролларни қайта сотиб олиш дастури» бошланишини эълон қилди.

Ҳукумат миллий қуролларни қайта сотиб олиш дастурини молиялаштиришини маълум қилган Албаниз, бу чорани собиқ Бош вазир Жон Ҳовард томонидан 1996 йилдаги Порт-Артур қирғинидан кейин шу каби режа ишлаб чиқилганидан буён кўрилган энг йирик тадбир сифатида таърифлади.

Бош вазирнинг таъкидлашича, бу дастур 1996 йилдаги ёндашув билан ҳамоҳанг бўлади ва асосий эътибор ортиқча, янги тақиқланган ҳамда ноқонуний ўқотар қуролларга қаратилади. Албаниз режанинг тафсилотлари келаси ҳафтадан бошлаб белгиланишини айтди.

Австралияда 4 миллиондан ортиқ ўқотар қурол борлигини қайд этган Албаниз: «Бондидаги даҳшатли воқеалар кўчаларимиздан кўпроқ қуролларни йўқотишимиз кераклигини кўрсатмоқда», — деди.

Австралияда илк умумий қурол авфи 1996 йилда Тасмания штатида Мартин Жон Брайант томонидан содир этилган, 35 киши ҳалок бўлган ва 23 киши яраланган Порт-Артур қирғинидан кейин эълон қилинган эди. Ўшанда авф чақириғига жавоб берган австралияликларнинг 1 миллион 26 мингга яқин қуроли йиғиб олиниб, йўқ қилинган эди.