Қобулда шифохона бомбаланди

Афғонистонда гиёҳвандликка қарамликни даволаш билан шуғулланувчи шифохонага уюштирилган ҳаво ҳужуми натижасида 400 киши ҳаётдан кўз юмди. Покистон расмийлари берган баёнотда “шифохона эмас, террор инфратузилмалари нишонга олинди” деган ибора ишлатилди.

Афғонистонда гиёҳвандликка қарамликни даволашга хизмат қилувчи шифохонага қилинган ҳаво ҳужумида 400 киши ҳалок бўлди.

Афғонистон маъмурияти сўзловчиси ўринбосари Ҳамдуллоҳ Фитрат ўзининг ёзма баёнотида: “Кечки соат 21:00 атрофида Покистон ҳарбий режими “Омид” гиёҳвандликни даволаш шифохонасини нишонга олган ҳаво ҳужумини амалга оширди. Ҳужум натижасида шифохонанинг катта қисми бутунлай вайрон бўлди”, — деб таъкидлади.

Ҳужум оқибатида шифохонанинг асосий қисми вайрон бўлганини қайд этган Фитрат, “ҳозиргача қурбонлар сони 400 нафарга етганини, 250 га яқин киши яраланганини” билдирди.

Покистон Ахборот вазири Аттауллоҳ Тарар эса АҚШда жойлашган “X” ижтимоий тармоғидаги платформа орқали берган баёнотида, Қобул ва Нангарҳордаги ҳужумларда “ҳарбий объектлар” нишонга олинганини маълум қилди.

Тарар Қобулдаги иккита нуқтада техник ёрдам инфратузилмаси ва ўқ-дорилар омбори йўқ қилинганини айтиб, шундай деди: “Ҳужумлардан кейин кузатилган иккинчи портлашлар катта ўқ-дорилар омбори мавжудлигига аниқ ишора қилмоқда”.

Афғонистонга қарши операциялар “кўзланган мақсадларга эришилгунга қадар давом этишини” қайд этган Тарар, Афғонистон маъмурияти “асоссиз даъволарни илгари сураётганини” айтди.

Покистон Ахборот вазирлигининг “X” платформасидаги расмий аккаунтидан кеча берилган баёнотда, Покистон 16 март кечаси Қобул ва Нангарҳорда “ҳарбий объектлар ва террорни қўллаб-қувватловчи инфратузилмани нишонга олгани” таъкидланди. Афғонистон маъмурияти сўзловчиси Забиҳуллоҳ Мужоҳиднинг шифохона уриб туширилгани ҳақидаги баёноти рад этилди.

Вазирлик баёнотида Мужоҳиднинг мақоласи “ҳақиқатни акс эттирмаслиги” ифода этилди.

Покистон 22 февраль куни мамлакатда “Покистон Толибони” (ТТП) томонидан уюштирилгани айтилган бомбали ҳужумларга жавобан, Афғонистон билан чегара чизиғидаги “террорчилар лагери” деб таърифланган 7 та нуқтага зарба берган эди.

Афғонистон маъмурияти ҳам 26 февраль куни чегара бўйлаб Исломободга тегишли ҳарбий объектларга ҳужумлар уюштирди. Покистон ушбу ҳужумларга қасос сифатида Қобулда ва чегара ҳудудларида баъзи нишонларни уришни бошлаганди.

Покистон ва Афғонистон 2025 йил октябрь ойида ҳам шунга ўхшаш кескинликни бошдан кечирган, томонлар 2025 йил ноябрь ойида сулҳ тафсилотларини муҳокама қилиш учун Истанбулда учрашган эдилар. Бироқ музокаралар натижасиз тугаб, тўхтатиб қўйилганди.

Исломобод ТТП Афғонистонда жойлашиб олганини ва ҳужумларини шу ердан туриб ташкиллаштираётганини даъво қилмоқда, Афғонистон маъмурияти эса бу даъволарни инкор этиб келади.