Футбол бўйича ЖЧ-2026 нинг барча иштирокчилари аниқланди

Бугун, 1 апрель куни АҚШ, Мексика ва Канадада бўлиб ўтадиган футбол бўйича Жаҳон чемпионатининг барча иштирокчилари маълум бўлди. Ўтиш ўйинлари бир нечта сенсациялар билан якунланди.

Саралаш қоидаларига кўра, аксарият терма жамоалар квалификациядан ўтгандан сўнг турнирда иштирок этиш ҳуқуқини қўлга киритдилар. Ўтган йилнинг ўзидаёқ 48 та иштирокчидан 42 таси аниқланган эди. Яна олтита терма жамоа мундиалга бугун якунланган ўтиш ўйинларидан сўнг йўл олди.

Саралаш босқичининг асосий кутилмаган воқеаси Италия терма жамоасининг навбатдаги муваффақиятсизлиги бўлди. Италянлар охирги марта 2014 йилги Жаҳон чемпионатида иштирок этишган. Шундан сўнг Швеция (2018) ва Шимолий Македония (2022) билан ўтиш ўйинларида омадсизликка учраган эдилар. Бу сафар италянлар йўлига таркибида “Астана” футболчиси Иван Башич ўйнайдиган Босния ва Герцеговина тўғаноқ бўлди.

Италянлар Мойзе Киннинг 15-дақиқадаги голидан сўнг ҳисобда олдинда бораётган эдилар, аммо 41-дақиқада Бастонининг майдондан четлатилиши боснияликларга ўйинни мувозанатлаштириш имконини берди. Натижада улар 79-дақиқада жавоб тўпини киритдилар ва пенальтилар сериясида кучлироқ чиқдилар.

Боснияликлардан ташқари, Европа саралашининг сўнгги ғолиблари турклар, чехлар ва шведлар бўлди. Қитъалараро саралашда эса Конго Демократик Республикаси ва Ироқ жамоалари ғалабани байрам қилдилар.

Ўтиш ўйинлари натижалари:

Босния ва Герцеговина – Италия: 1:1 (пенальтилар бўйича 4:1);

Косово – Туркия: 0:1;

Чехия – Дания: 2:2 (пенальтилар бўйича 3:1);

Швеция – Польша: 3:2;

Конго ДР – Ямайка: 1:0;

Ироқ – Боливия: 2:1.

Футбол бўйича 2026 йилги Жаҳон чемпионатининг барча иштирокчилари

A гуруҳи: Мексика, Жанубий Африка Республикаси, Корея, Чехия;

B гуруҳи: Канада, Қатар, Швейцария, Босния ва Герцеговина;

C гуруҳи: Бразилия, Марокаш, Гаити, Шотландия;

D гуруҳи: АҚШ, Парагвай, Австралия, Туркия;

E гуруҳи: Германия, Кюрасао, Кот-д'Ивуар, Эквадор;

F гуруҳи: Нидерландия, Япония, Тунис, Швеция;

G гуруҳи: Бельгия, Миср, Эрон, Янги Зеландия;

H гуруҳи: Испания, Кабо-Верде, Саудия Арабистони, Уругвай;

I гуруҳи: Франция, Сенегал, Норвегия, Ироқ;

J гуруҳи: Аргентина, Жазоир, Австрия, Иордания;

K гуруҳи: Португалия, Ўзбекистон, Колумбия, Конго ДР;

L гуруҳи: Англия, Хорватия, Гана, Панама.

Эслатиб ўтамиз, футбол бўйича Жаҳон чемпионати 11 июндан 19 июлга қадар АҚШ, Мексика ва Канадада бўлиб ўтади. Шу билан бирга, Эрон терма жамоасининг турнирдаги иштироки билан боғлиқ масала ҳалигача ҳал этилмаган.