Месси “Интер Майами”га ўтди

Аргентиналик ҳужумчи Леонель Месси ўз фаолиятини MLS да (АҚШ ва Канада футбол олий лигаси) давом эттиришини маълум қилди. “Барселона” ва “Пари Сен-Жермен” собиқ футболчиси ўз чиқишида ушбу маълумотни тасдиқлади.

Месси “Мен “Барселона”га қайтмайман, мен “Интер Майами” жамоасига ўтаман. Ҳали бироз майда масалалар бор, лекин у жамоага ўтишим бўйича масала деярли 100% ҳал этилган.

Мен ўзимнинг собиқ жамоамга қайтишни қаттиқ хоҳлагандим. Лекин бошимдан ўтганларни ўйлаб, ўз келажагимни бошқаларнинг қўлида қолдиришни истамадим. Мен ўзимни ва оиламни ўйлаб ўзим  қарор қабул қилишни хоҳладим.

Мен “Барселона”га ўтишим учун жамоа бир неча футболчиларни сотиши кераклигини ёки маошларини пасайтириш лозимлигини эшитиб, зиммамга бундай масъулият олишни истамадим.

Пул мен учун ҳеч қачон биринчи ўринда турган эмас. Агар ҳамма гап пулда бўлганида Саудия Арабистон ёки бошқа бир ўлкадаги жамоага борган бўлардим. Мен пулни ўйламасдан қарор қабул қилдим” деди.

ПСЖ 2022-2023 йилги мавсум ниҳоясига етгач, Мессининг жамоадан кетишини эълон қилганди. 35 ёшли футболчи жамоани эркин агент сифатида тарк этди. У 2021 йилдан бери жамоа сафида тўп суриб келаётганди.

“Интер Майами” жамоасининг таклифини қабул қилишдан олдин Месси “Барселона” ва Саудия Арабистонинг “Ал-Ҳилол” жамоаларининг таклифини рад этганди. “Ал-Ҳилол” футболчи учун икки йилга 1,2 миллиард евро тўлашга тайёр эди.

Месси ўтган мавсумда ПСЖ сафида жами барча турнирларда 41 матч ўтказиб, 21 гол урди ва 20 та натижали пас берди.