Шарқий Ўрта денгиздан Теҳронгача чўзилган махфий режа барбод бўлди

Исроилнинг "Ynet" газетаси Тель-Авив раҳбариятининг Эрондаги режимни ағдариш ва минтақани харитадан ўчириб ташлаш мақсадида тузган махфий операциясининг парда орти тафсилотларини ёзиб чиқди. Моссад ва Тель-Авив кабинетининг курд гуруҳлари орқали Эронни босиб олиш режаси президент Ражаб Тоййиб Эрдўғоннинг АҚШ президенти Дональд Трамп билан ўрнатган тўғридан-тўғри дипломатияси туфайли барбод қилингани тан олинди.

Исроилнинг етакчи нашрларидан бири бўлган "Ynet" журналист Надав Эял имзоси билан эълон қилинган таҳлилий мақолада Тель-Авивнинг Эронга қарши режалаштирган ва "Наъра тортаётган арслон" номини олган махфий операцияси муваффақиятсизлик билан якунланганини ёзди.

Исроил разведка хизмати Моссад, Исроил армияси ва Тель-Авив кабинети ўртасида юзага келган чуқур келишмовчиликлар ошкор қилинган хабарда Биньямин Нетаньяху ҳукумати минтақани қон кўлига айлантирадиган мегаломаник режимни ўзгартириш лойиҳасига қўл ургани, аммо Анқаранинг дипломатик тўсиғига дуч келгани таъкидланди.

"Ynet" томонидан берилган маълумотларга кўра, Моссад ва Нетаньяху ҳукумати тахминан 15 минг кишилик, террорчи ташкилот PJAK томонидан қўллаб-қувватланадиган курд коалициясини тузиб, ушбу кучларни Исроил Ҳарбий-ҳаво кучлари кўмагида Эрон ҳудудига киритиш ва Теҳронга қараб юриш қилиб режимни ағдаришни мақсад қилган.

Бироқ операция бошланишига саноқли кунлар қолганда президент Ражаб Тоййиб Эрдўғоннинг аралашуви билан Тель-Авивнинг тузоғи барбод бўлди.

Эрдўғон АҚШ президенти Дональд Трамп билан ўтказган муҳим телефон сўзлашувида Туркия ўз чегараларида ва минтақасида бундай террор коридори ҳамда босқинчилик ҳаракатига асло йўл қўймаслигини ва бу вазият Туркия ҳамда Исроил ўртасида тўғридан-тўғри урушга айланиб кетиши мумкинлиги ҳақида огоҳлантиргани қайд этилди.

Исроил матбуоти Эрдўғон ва Трамп ўртасидаги ушбу кучли дипломатик мулоқотдан сўнг Оқ уй курд босқини режасига эшикларни бутунлай ёпгани ва Тель-Авив марказга қўйган улкан операция ҳали бошланмасдан чипакка чиққанини ёзиб чиқди.

Хабарда Моссад раҳбари Давид Барнеа ва Нетаньяху Эроннинг собиқ президенти Маҳмуд Аҳмадинежодни инқилобдан кейинги "ўзлаштирилган" раҳбар сифатида Теҳрон тепасига олиб келиш хомхаёлига берилгани, аммо АҚШ Туркиянинг огоҳлантиришидан сўнг ўз қўллаб-қувватловини қайтариб олгач, Тель-Авив саросимада бошқа шошилинч режаларга суянгани эслатиб ўтилди.

Исроил армияси ва Ҳарбий разведкаси (Аман)нинг "курдлардан фойдаланиш ва режимни ағдариш хаёллари фиаско билан якунланади" деган огоҳлантиришларига қарамай, Нетаньяху ушбу авантюрага берилгани айтилади. Шунингдек, исроиллик расмийлар Туркиянинг минтақавий қудратини ва Эрдўғоннинг Трампга бўлган дипломатик таъсирини ҳисобга олмай, оғир стратегик мағлубиятга учрагани таъкидланди:

"Туркиянинг суверенитетга эга мамлакат назоратини қўлга киритишга уринаётган курд кучига қарши чиқишини олдиндан кўриш мумкин эди. АҚШ маъмуриятини биладиган ҳар бир киши Трампнинг Эрдўғон билан яқин муносабатда эканини билади. Исроил Туркияга қарши тайёргарлик кўрмасдан бундай операцияга қандай қўл урди? Эрдўғон досьесини ким қўлида ушлаб турган эди? Туркия курд ташаббусини ягона телефон сўзлашуви билан барбод қилди."

Таҳлилда Нетаньяху ҳукумати ғалаба иллюзиясини яратишга уринишига қарамай, Исроил жамоатчилигининг 89 фоизи урушда ғалаба қозонмаганига ишониши билдирилган. Исроилнинг стратегик хатолари ва Туркиянинг минтақавий мувозанатни сақлаб қолган аралашуви натижасида Эрон ва қарши кучлар ўзини ўнглаб олгани, глобал савдо ва энергиянинг юраги ҳисобланган Ҳурмуз бўғозида назорат тўлиқ Теҳрон қўлига ўтгани қайд этилган.