ТРАМП - Пентагон қўлида қўғирчоқ!

Сурия анча йиллардан буён тўполон майдони бўлиб келмоқда. Яқин ва Ўрта шарқ деб номланувчи минтақа алғов-далғов. Афтидан ҳали-бери тузаладиганга ҳам ўхшамайди. Арбобига маълумки, жаҳон сиёсатида "Дунё низоми" деган тушунча бор. Бу компьютер ўйинларидаги босқичга (уровень) ўхшайди. Бир босқичдан иккинчи босқичга ўтиш катта оламшумул жанжаллар, тубдан ўзгаришлар, тўнтаришлар эвазига амалга ошади. Масалан, Ўрта асрлардан бери оламга ҳукмрон бўлиб келаётган янги ерлар кашфи, мустамлакаси, подишоҳлик ва қиролликлар (империялар) тизимига суянадиган дунё низоми биринчи жаҳон уруши оқибатида тубдан ўзгарди. Бу давр, айниқса мусулмон ўлкалар мустамлакаси ва империялар ўрнини майда-чуйда давлатчаларга бўшатишига асосланган низом бўлиб, то иккинчи жаҳон (ёки Улуғ Ватан) урушигача ҳукм сурди. 1945 йилдан бошлаб икки қутбли дунё низомига эврилди. Биринчи қутб христиан капиталистлар (марказида АҚШ), иккинчи қутб динсиз социалистлар (марказида СССР) қутбини ташкил қилди. ХХ- аср охирида СССР блоки тугатилгач, жаҳон ягона қутбли дунё низомига эшик очди. Шу давргача етиб келган барча йирик давлатлар фақатгина нефть орқали семирарди. Нефть қудуқлари кимда бўлса, ўша яккаҳокимлик ёхуд унга рақиблик қилиш имконига эга бўларди. АҚШга рақиб қолмагач, сунъий душман ўйлаб топиш эҳтиёжи туғилди. У ҳам қисқа вақтда топилди: марказида ЯҚИН-ЎРТА ШАРҚ билан АФРИКА бўлган мусулмон ўлкалар! Чунки ерюзининг асосий нефть конлари мана шу минтақаларда эди.

АҚШ, шундай Янги дунё низомини барпо қилишга яқин кўмакчилари собиқ блокдошлари Британия, Франция, Германия ва ҳ. лар билан биргаликда бел боғласа ҳам, асл мақсади ўлжанинг катта қисмидан уларни батамом маҳрум қилиш эди. Бундан норози бўлган Британия ҳам зимдан АҚШни ташқарида қолдирадиган лойиҳа устида ишлай бошлади. Бу Евроосиё материгини у бошда бу бошга боғлаб, 65та давлатдан ўтадиган янги ИПАК ЙЎЛИ лойиҳаси эди. Инглизлар Хитойни йирик ишлаб чиқарувчи давлатга айлантириб, мана шу лойиҳани амалга оширишга киришди. Ундан хабар топган АҚШ дарров қарши ҳамла уюштирди. Юқорида айтганимиздек янги босқичга ўтиш учун доимо ер юзини титратадиган катта ҳодиса керак. 2001 йилда Нью-Йоркдаги иккита эгизак осмонўпар (Дунё Тижорат Уйи) бинога уюштирилган терактлар АҚШнинг Ўрта Шарққа қурол ўқталиб кириб боришига замин ясади. Бу билан АҚШ Ипак Йўлининг асосий бекатларидан Ироқ ва Афғонистонни фалажга учратиб, Британияни доғда қолдирди. У ҳам етмагандек Араб баҳори ҳодисаларини бошлаб бериб, Ипак Йўлини батамом ўзига боғлаб олишга киришди. Аввал ал-Қоида, кейин Ишид, ҳозир YPG  (ЙПГ) курд қуролли террор ташкилотларини қуриб, ҳомийлик қилишга ўтди. 

Лекин ИПАК ЙЎЛИнинг асосий калит ўлкаларидан ТУРКИЯ, Фирот қалқони ва Зайтун бутоғи ҳарбий операциялари орқали АҚШ парвариш қилаётган ИШИД ва ЙПГ кучларини тарқатиб, ўйинни бузди. Бундан пайтавасига қурт тушганлар кам эмас. Уларнинг энг бошида ВАШИНГТОН турибди. Лекин АҚШ ичида ҳам катта зиддиятлар кузатилмоқда. Келинг бугун ўша масалаларга бир назар ташлайлик...

АҚШ президенти Трампни Вашингтонда жиддий қабул қиладиганлар борми ўзи? Бу саволнинг жавоби ЙЎҚқа жуда яқин. Ташқи ишлар вазири Тиллерсон, мудофаа вазири Мэттис, бош штаб раиси Данфорд, миллий хавфсизлик бўйича маслаҳатчи Макмастер, ички хавфсизлик маслаҳатчиси Том Боссерт, Оқ уй матбуот котиби Сара Сандерс, куёви Джаред Кушнер, Оқ уй ҳуқуқ маслаҳатчиси Дональд Мак-Ган...

Бу ва бошқаларни ҳам қўшиб санаганда ҳеч ким Трампнинг биронта буйруғини бажармаяпти. Мэттис ва Макмастер ҳатто Трампнинг телефон қўнғироқларига ҳам жавоб бермаяпти.

Рўйхатдаги энг тажрибасизи Оқ уй матбуот котибаси Сара Сандерс ҳам Трамп тавсия қилган матнга бемалол ўзгартиришлар киритмоқда.

Трамп эмас, балки Оқ уй хоҳлаган матн оммавий ахборот воситаларига узатилмоқда. Оқ уйда авваллари ҳам президентларнинг барча талаблари бажарилмасди, бу СИР эмас. Лекин шу вақтгача ҳеч ким Трампдек бечора аҳволга тушмаганди. Декабрь ойида Трамп АҚШнинг Қудусга доир янги қарашларини эълон қилди.

Бу баёнот расмий равишда эълон қилинмаслиги керак эди. Пентагондаги куч, бу баёнот эълон қилинмасин деб президентга қатъий айтди. Лекин Трамп журналистлар олдида расмий чиқиш қилди! Пентагон ўша куни ҳам, ҳозир ҳам Қудус масаласига дастак бераётгани йўқ. АҚШдаги асосий Куч сифатида ҳам Пентагоннинг асло бу лойиҳа тарафдори бўлмаслиги аниқ эди.

Трампнинг куёви Кушнер, Америка элчихонасининг Қудусга кўчириш фикрини тайёрлаган одам. Лекин Трамп бу лойиҳадан энг охирида хабардор бўлди.

Албатта, асосий фикрни биларди, лекин тафсилотлар Трампдан ҳам яширин тутилди. АҚШдаги ички мувозанатнинг алғов-далғовлиги Трампнинг лавозимдан кетишига сабаб бўлувчи даврни бошлаб берди.

Трамп, сира жини суймаган шахс МЮЛЛЕРни лавозимдан бўшатиш учун 2017 йил июнь ойидан эътиборан 4 марта уриниб кўрди. Оқ уйнинг ҳуқуқ бўйича маслаҳатчиси Мак-Ганни овал офисига чақирган Трамп, прокурорни лавозимдан олиш ниятини айтиб, керакли ҳужжатларни тайёрлашни талаб қилди. Бу ҳақда қатъий буйруқ ҳам берди...

Шунда бизга номаълум гаплар эшитди.

Дон Мак-Ган Трампга “Бу қадамни ташлашинг билан оилангдан ҳеч ким қолмайди. Буни тушунмаганингга ҳайронман. Бу ерда Трамп ширкатларини бошқармаяпсан. Бажарилиши керак бўлган ишлар сенга айтилади ва сен уларни амалга оширасан, холос” деди.

Бу ҳазил эмас, ҳақиқат! Шу кундан кейин Трамп яна 3 марта Мюллерни ишдан бўшатишга уринса ҳам муваффақиятсизликка учради ва командасидан кўплаб кишилар ҳибсга олинди. Оила аъзоларигача етиб борган терговлардан кейин Трамп қаршисидаги кучни ниҳоят кўрди. Оқибатини нималарга олиб келишини ҳам сезди. Яъни унга кўрсатишди...

Трамп АҚШнинг Ўрта Шарқ сиёсатида ҳам йўқ. Ҳатто фикрини сўрайдиганлар ҳам йўқ.

Туркия билан АҚШ орасидаги зиддиятни камайтириш учун бир неча марта қадам ташлашга уринган Трамп яна Пентагон томонидан тўхтатилди. Пентагон АҚШга иттифоқдошларни Трамп танлай олмаслигини кўп бора маълум қилди. Трамп учун YPG террористик ташкилот, лекин Пентагон учун воз кечиб бўлмайдиган иттифоқдош!

ИШИД ҳам Трамп учун террор ташкилоти. Ҳатто Трамп “ИШИДни Обама ва унинг командаси қурди” деди. У ҳалигача шу фикрда. Лекин Пентагон учун ИШИД воз кечиб бўлмайдиган ҳамкор. Орадаги келишмовчилик ана шу даражада! АҚШ ПРЕЗИДЕНТИ террор ташкилотига ТЕРРОР ТАШКИЛОТИ деса ҳам, баъзилар парво ҳам қилмаяпти!?

Чунки у ташкилотлардан фойдаланаётганлар бошқалар...

Афғонистонда кучини орттирмоқчи бўлган АҚШ, Хитойга қарши Кобулда ИШИДни қайта сафга тизди. Хитой Афғонистонда ҳарбий база қурди. Афғонистон-Тожикистон чегарасидаги ҳарбий база Америка учун катта муаммо. ЧункиПЕКИН бу ердан Ипак йўлининг назоратини таъминлашда қулай имкониятга эга бўлади. АҚШ буни кўрди ва ИШИДни шу жойга йўллади.

ИШИД ҳам кутиб ўтирмай Хитойга қарши ҳаракатини бошлаб юборди. Кобулда 6 кунда 3 та теракт содир бўлди. Бизда кичик хабардек айтилиб ўтган бўлса ҳам, Толибон ва ИШИД террор ташкилотлари зиммаларига олган терактлар ягона марказдан, яъни ПЕНТАГОНдан бошқарилмоқда! Қайси ниқоб билан портлашлар содир қилинса ҳам биз барчасига ИШИД деб қарашимиз керак. Чунки ИШИД минтақага ўт қўймоқда. Терактлар янада шиддатли тус олади.

Агар Пентагон, YPG билан ИШИД орқали ЕВРООСИЁда янги давлат хариталари чизишни уддалай олмаса, Ўрта Шарқ, Осиё ва Африкада бундан ҳам катта терактлар содир бўлади. АҚШ бой берган сайин зўравонлигини орттиради. Чунки ҳозирги ҳодислар АҚШ учун ҳаёт-мамот масаласи! Ё ҳамма ёққа ўт қўйиб яккаҳоким бўлади, ёхуд барча операциялари муваффақиятсизликка учраб, ичидан емирилади. АҚШни кутиб турган оқибат мана шу!

Бу орада Америка молиявий тизимида катта пул йўқотиши юз бермоқда. Биз томонларда негадир ҳеч ким буни сезмаяпти.

Трамп бироз вақт аввал “Ўрта Шарқда 6 триллион доллар сарфладик. Бундай маблағ билан ватанимизни янгидан икки марта қайта қуришимиз мумкин эди. Бундан ҳам бахтлироқ Америка барпо қилган бўлардик. Биз Ўрта Шарқда урушқоқ давлат сифатида ёдда қолишни хоҳламаймиз” деди.

Лекин Пентагон қурол ширкатларининг босими билан минтақада УРУШ алангасини ёқмоқда. Трампнинг Қудус қарори улар қўмсаган ўша УРУШ чиқишига яхши сабаб бўлса ҳам, диний томондан Пентагон бунга тиш-тирноғи билан қарши. Ҳозир ҳам шундай.

Трамп Туркия билан ҳамкорлик қилиш тарафдори, Пентагон эса, йўқ. Чунки Пентагон турк армияси ичига жойлаштирган яширин кучи- Фетуллах Гулен шогирдларини йўқотди. Пентагон ҳозир ҳам деярли барча ўлкаларнинг миллий армияси таркибига таъсир қила оладиган позицияда. Туркияда ҳам шундай эди.

Лекин Туркияда амалга ошмай қолган 15 июль (2017) тўнтаришида барча одамлари фош қилиниб, тум-турақай қочишди. Энди Пентагон ўтмишдаги "кучли" кунларини қўмсамоқда. Энг катта муаммолари ҳам шу! Ичкарида одамлари бўлмагач, олдларини кўра олишмаяпти, шу сабабли қадам ташлашга ҳам юрак дов бермаяпти.

Лекин Пентагон барибир, Туркия билан зиддиятларни кучайтириш режаларини тузмоқда. Ҳар куни ПЕНТАГОНда "Туркиянинг таъзирини қандай берсак экан" деган режа муҳокама қилинмоқда. Шунча вақт ҳаяллаб қолишлари аслида ҳеч қандай чора топа олмаётганларидан дарак.

Пентагон тузган режасини амалга оширишга қарор қилган куни ТРАМП лавозимида ўтирмайди.

РЕЖАнинг ЭНГ МУҲИМ НУҚТАСИ ШУ! Очиғини айтсак, улар бекорга вақт сарфлаяпти. Трампни олиб ташлаш билан ҳеч нарса ўзгармайди. Минтақада охирги сўзни Туркия айтади. Сиз, ўзини портлатувчиТЕРРОРчилар кўмагида урушдан ғолиб чиққанларни ҳеч кўрганмисиз? Биз ҳам кўрмаганмиз. АҚШнинг бугун тутган йўли мана шу.