Словакияда давлат тўнтариши хавфи

Словакия бош вазири Роберт Фицо пайшанба куни Хавфсизлик кенгашини йиғиб, мамлакатга “рангли инқилоб” хавфи таҳдид солаётганини айтди.

Фицо Словакия мухолифатини чет эл тузилмалари билан алоқада бўлишда ва мамлакатда ҳокимиятни ўзгартиришни режалаштираётганликда айблади. Унинг сўзларига кўра, ушбу тузилмалар Грузия ва Украинада шунга ўхшаш тўнтаришларни уюштириш тажрибасига эга.

Ўз навбатида, мухолифат бош вазирни Кремль тарафдори ва мамлакатни Европа Иттифоқи ҳамда НАТОдан чиқариш ниятида эканлигида айбламоқда. Аммо Роберт Фицо бу айбловларни қатъий рад этмоқда.

Декабрь ойида Роберт Фицонинг Москвага ташрифи ва Владимир Путин билан учрашувидан сўнг Словакияда норозилик намойишлари авж олди. Жорий йил январ ойи бошларида вазият янада чигаллашди, чунки Украина “Газпром” билан шартнома муддати тугагани сабабли Россия газини Словакия орқали транзит қилишни тўхтатди. Шу вақтда Фицо украиналик қочқинларга кўмакни қисқартириш ва Киевга электр энергия етказиб беришни чеклаш билан таҳдид қилди.

Мухолифат эса жавоб сифатида ҳукуматга нисбатан ишончсизлик вотуми юзасидан овоз беришни режалаштирмоқда. Сешанба куни бош вазир бу уринишни амалда барбод қилишга муваффақ бўлди.