АҚШда CIA ва FBI нинг собиқ раҳбарларига нисбатан тергов бошланди

АҚШда Марказий разведка бошқармаси (CIA)нинг собиқ директори Жон Бреннан ҳамда Федерал тергов бюроси (FBI)нинг собиқ раҳбари Жеймс Комейга нисбатан «вазифасини суиистеъмол қилганлик» айблови асосида тергов ишлари бошлангани маълум қилинди.

Fox News телеканали АҚШ Адлия вазирлигидаги манбаларга таянган ҳолда хабар беришича, амалдаги CIA директори Жон Рэтклифф Жон Бреннан томонидан хизмат ваколатларининг суиистеъмол қилингани ҳақидаги далилларни FBIга тақдим этган. Манбаларнинг маълум қилишича, шу асосда FBI томонидан Бреннанга нисбатан расмий тергов бошланган.

Шунингдек, манбалар Жеймс Комейга нисбатан ҳам тергов ишлари бошланганини маълум қилган. Тергов 2016 йилги АҚШ президентлик сайловларига Россия аралашгани ҳақидаги даъволар ортидан ўтказилган текширувлар ва мазкур собиқ раҳбарларнинг Конгрессда нотўғри баёнот берганлиги эҳтимоли билан боғлиқ.

Ҳозирча терговга оид батафсил маълумотлар берилмаган, бироқ FBI томонидан Бреннан ва Комей ўртасидаги алоқа “мувофиқлаштирилган тил бирикмаси” сифатида баҳоланаётгани таъкидланган.

Бундан ташқари, CIA 3 июль куни маълум қилганидек, Россиянинг 2016 йилги сайловларга Трамп фойдасига таъсир кўрсатгани ҳақида тайёрланган махсус ҳисобот шошма-шошарлик билан ва етарлича асосларсиз тайёрлангани аниқланган.

Эслатиб ўтамиз, 2016 йилги сайловларда Россия ҳукумати Трамп фойдасига аралашгани ҳақидаги даъволардан сўнг, 2017 йили Роберт Мюллер махсус прокурор сифатида тайинланган ва Дональд Трампнинг сайловдаги кампанияси фаолияти юзасидан тергов олиб борилган эди. Деярли 2,5 йил давом этган тергов натижасида Трампни айблашга асос бўладиган аниқ далил топилмаган ва иш ёпилган эди.

Трамп маъмурияти даврида АҚШ адлия вазири бўлган Уильям Барр Россия терговининг келиб чиқиши юзасидан алоҳида суриштирув ўтказиш учун Жон Дарҳамни махсус прокурор сифатида тайинлаган. Дарҳам бошчилигидаги тергов доирасида икки шахс далилларни сохталаштиргани ва Трампни айблашга уринишганини тан олган.