Танасидан 16 килограммлик паразит эгизак олиб ташланди

Ҳиндистоннинг Деҳли шаҳрида шифокорлар ноёб жарроҳлик амалиётини ўтказишди. 17 ёшли йигитнинг қорнидан 16 килограммлик паразит эгизак олиб ташланди. Жуда кам учрайдиган бу ҳолат мутахассисларни ҳам ҳайратга солди.

Паразит эгизак – ҳомиланинг тўлиқ ривожланмасдан, соғлом эгизагига боғлиқ ҳолда қолиб кетиши натижасида юзага келадиган ноёб тиббий ҳолатдир.

Уттар-Прадеш штатида яшовчи йигит туғилганидан бери қорнидан ташқари чиқиб турган икки оёқ билан яшаган. Операциядан сўнг ўзини эркин ҳис қилаётганини таъкидлаб, таълим олиш ва яхши ишга жойлашиш нияти борлигини айтди.

Операцияни Деҳли Тиббий Фанлар Институти (AIIMS) мутахассислари муваффақиятли ўтказишди. Жамоа раҳбари доктор Асури Кришнанинг сўзларига кўра, бу каби ҳолатлар жуда кам учрайди:

“Ҳозиргача дунё бўйича шундай фақат 50 га яқин ҳолат қайд этилган. Уларнинг аксарияти кичик болаларда учраган ва операция қилинган. Шунинг учун биз бу амалиётни тажриба, малака ва сезгирликка асосланган ҳолда ўтказдик.”

Шифокорлар текширувлар чоғида паразит эгизакнинг йигитнинг кўкрак суягига боғланганини ва унинг қон томирларидан озиқланаётганини аниқлашди.

Қоннинг 40% қисми паразит эгизакка йўналгани сабабли, операция давомида йигитнинг қон босими хавфли даражада тушиб кетди. Бироқ тезкор тиббий аралашув орқали унинг ҳолати барқарорлаштирилди.

Операциядан тўрт кун ўтиб касалхонадан соғлом ҳолда чиққан йигит ўз ҳиссиётларини шундай изоҳлади:

“Бу – тиббиёт ва жамоавий ишлаш кучини намоён этувчи катта ютуқдир.”