Депутат АҚШдан Озодлик ҳайкалини қайтаришни талаб қилмоқда

Франциялик Европа парламенти депутати Рафаэль Глюксманннинг фикрича, АҚШ Франция томонидан XIX асрда совға қилинган Озодлик ҳайкалини қайтариши керак.

Бу ҳайкал Америка мустақиллигининг юз йиллиги муносабати билан французлар томонидан АҚШга совға қилинган эди.

"Франция Озодлик ҳайкалини қайтариб олиши керак, чунки АҚШ энди уни совға қилишга сабаб бўлган қадриятларни ифодаламайди", — деди депутат.

Бу ҳақда Рафаэль Глюксманн ўзига тегишли Place Publique номли марказчи-сўлчилар ҳаракати съездида айтиб ўтди.

"Биз мустабидлар томонини танлаган, илмий эркинликни талаб қилган тадқиқотчиларни ишдан бўшатган америкаликларга шундай деймиз: "Озодлик ҳайкалини бизга қайтаринг", — деди у ўз тарафдорлари олдида.

Шунингдек, Европа депутати АҚШнинг Россиянинг Украинага тўлақонли босқинига нисбатан тутган позициясини танқид қилди ва ултраўнг кучларга қарши "демократик қаршилик"ка чақирди.

Озодлик ҳайкали француз ҳайкалтароши Огюст Бартольди томонидан АҚШ мустақиллик уруши вақтида икки мамлакат ўртасидаги иттифоқчилик хотирасига бағишлаб ишлаб чиқилган.

Ҳайкал 1886 йил 28 октябрда, Америка Декларациясининг 100 йиллиги муносабати билан очилган ва ҳозирда Нью-Йоркдаги Манҳэттен жанубида жойлашган Озодлик оролида турибди.