АҚШга олиб кириладиган автомобилларга 25 фоизлик тариф

Трамп мамлакатга олиб кириладиган автомобилларга 25 фоизлик бож жорий қилмоқда. Бу АҚШ президентининг энг оғир савдо қарорларидан бири бўлиши мумкин.

3 апрелдан бошлаб АҚШга олиб кириладиган барча тайёр автомобилларга янги 25 фоизлик бож тўланади. Кейинчалик бу айрим эҳтиёт қисмларга ва эҳтимол, барча эҳтиёт қисмларга ҳам тааллуқли бўлади. Бундай тариф жорий этилиши Шимолий Америкадаги автомобил савдосига катта таъсир кўрсатади, келажакда эса бутун дунёга ёйилиши мумкин.

Фармонни имзолар экан, Трамп ушбу тариф 2 апрелда – у "озодлик куни" деб атаган санада кучга киришини эълон қилди.

Бу қарор Европа Иттифоқи ва Канада Бош вазири Марк Карни томонидан кескин танқид қилинди. Карни буни "Канада ишчиларига қарши тўғридан-тўғри ҳужум" деб атади.

Шу билан бирга, янги бож жорий этилиши мураккаб жараён бўлиши мумкин, чунки АҚШ автомобил ишлаб чиқарувчилари бутун дунёдан эҳтиёт қисмлар сотиб олади. Бу эса уларнинг харажатларининг ошиши ва сотувнинг камайишига олиб келиши мумкин.

Чоршанба куни General Motors акциялари тахминан 3 фоизга пасайди. Ford акциялари бироз ўсган бўлса, Jeep ва Chrysler’га тегишли Stellantis компаниясининг акциялари қарийб 4 фоизга тушиб кетди.

Ҳатто АҚШда заводлари мавжуд бўлган маҳаллий ва хорижий компаниялар ҳам эҳтиёт қисмлар ва автомобиллар етказиб беришда Канада, Мексика ва бошқа давлатларга боғлиқ. Бу эса нархларнинг ошиши ва сотувнинг пасайишига олиб келиши мумкин, чунки янги заводлар қуриш кўп вақт талаб этади.

Нашрларга кўра, божлар Трампнинг жаҳон савдо муносабатларини ислоҳ қилиш бўйича ҳаракатларининг асосий қисми ҳисобланади.

Аввалроқ Трамп автомобилсозлик сектори учун 25 фоизлик тарифни кечиктирган эди. Шу вақт мобайнида Америка автомобил ишлаб чиқарувчилари ўз ишлаб чиқаришини АҚШга кўчириши керак эди.