АҚШ “Озодлик Радиоси”нинг сунъий йўлдошларни ўчириб қўйди

АҚШнинг Глобал Медиа Агентлиги (USAGM) 3 апрель, пайшанба куни “Озод Европа/Озодлик Радиоси” (РЕЕ/РС) медиа корпорациясининг рус тилидаги эшиттиришларини трансляция қилувчи сунъий йўлдош хизматларини тўхтатди.

"Бугун ишга келсак, Россияни қамраб олган сунъий йўлдош хизматлари USAGM томонидан ўчириб қўйилганини кўрдик", — деди AFP ахборот агентлигига РЕЕ/РС ижрочи директори Стивен Капус.

Бу қарор 24 соатлик рус тилидаги “Жорий вақт” телеканали эфирининг Россия, Украина, Марказий Осиё, Шарқий Европа ва бошқа минтақаларда узатилишига таъсир қилди.

Капуснинг сўзларига кўра, ҳозирда Россиядаги томошабинлар экранларида қизил фон устида қуйидаги ёзув намоён бўлмоқда: “Афсус билан маълум қиламизки, АҚШ Глобал Медиа Агентлиги ‘Жорий вақт’ трансляциясини тўхтатиш қарорини қабул қилди”.

USAGM ҳозирча бу ҳолат юзасидан расмий изоҳ бермади.

Вашингтондаги федерал округ суди 25 март куни АҚШ президенти Дональд Трамп ва USAGM раҳбари Кари Лейк томонидан РЕЕ/РС молиялаштирилишини тўхтатиш тўғрисидаги қарорни вақтинча тўхтатди. Судья Ройс Ламбертнинг таъкидлашича, бу қарор амалга оширилса, РЕЕ/РСга “қайта тиклаб бўлмайдиган зарар” етказилиши мумкин эди.

Унинг сўзларига кўра, USAGM раҳбарияти “биргина жумла билан, деярли ҳеч қандай асоссиз, РЕЕ/РС фаолиятини тўхтатишга мажбурлай олмайди, ҳатто бундай фармонни президент берган бўлса ҳам”.

2025 йил октябригача “Озодлик Радиоси” АҚШ федерал ҳукуматидан Конгресс томонидан ажратилган 77 миллион доллар маблағни олиши керак.

Эслатиб ўтамиз, март ойи ўрталарида Трамп бир қатор агентликлар фаолиятини қисқартиришга қаратилган фармонни имзолаганди. Улар орасида “Озод Европа / Озодлик Радиоси” ва “Америка Овози”ни назорат қилувчи USAGM ҳам бор эди. Кейинчалик маълум бўлишича, Трамп маъмурияти “Озодлик Радиоси” тармоғини тўлиқ молиялаштиришни бекор қилган.

“Озод Европа / Озодлик Радиоси” — 1953 йилда ташкил этилган мустақил медиа корпорация бўлиб, унинг фаолияти АҚШ Конгресси томонидан ажратиладиган маблағлар орқали, USAGM воситасида молиялаштирилади. Дональд Трамп Оқ уйга қайтгандан сўнг, агентликдаги ходимлар сони сезиларли даражада қисқартирилди.