Қозоғистонда маҳаллий полиция хизмати энди бўлмайди

Мажилис полиция фаолиятидаги бюрократияни қисқартиришга қаратилган қонун лойиҳасини иккинчи ўқишда маъқуллади. Бу 2022 йил 13 апрелда Президент томонидан қабул қилинган “Давлат аппарати фаолиятини дебюрократизация қилиш чора-тадбирлари тўғрисида”ги фармойишни амалга ошириш мақсадида қилинмоқда.

Асосий ўзгаришлардан бири — 2016 йилда ташкил этилган “маҳаллий полиция хизмати” (МПХ) тушунчаси қонунлардан чиқариб ташланмоқда. Лойиҳа ишлаб чиқувчиларнинг таъкидлашича, МПХ ўз вазифаларини самарали бажара олмаган — жамоат тартибини сақлаш ва ҳуқуқбузарликларнинг олдини олиш ўрнига полиция кўп ҳолларда иккинчи даражали ишлар, масалан, ободонлаштириш ёки чиқиндиларни чиқариш каби вазифалар билан шуғулланган.

“Ички ишлар вазирлиги томонидан МПХ ва Маъмурий полиция бошқармасини қайта ташкил этиш таклиф қилинмоқда. Улар асосида ҳуқуқбузарликларнинг олдини олиш ҳамда жамоат хавфсизлигини таъминлаш бўйича икки бошқарма ташкил этилади. Ҳар бир хизмат ўзининг тўғридан-тўғри вазифалари билан шуғулланади”, — дейилади Мажилис хабарида.

Қонун лойиҳасида айрим атамаларга ҳам озгина ўзгаришлар киритилган. Масалан, транспортдаги полиция бўлимлари энди “йўналишли” деб аталмайди. Шунингдек, ҳарбий-тергов органлари алоҳида тузилма сифатида ажратилади — улар полициянинг ҳудудий органларидан чиқарилади.

Маҳаллий полиция хизмати (МПХ) Қозоғистонда 2016 йилда ташкил этилган эди. У ижро ҳокимияти ва аҳолига бўйсунган ва унинг вазифаларига жамоат тартибини сақлаш, ҳуқуқбузарликларнинг олдини олиш, йўл ҳаракати хавфсизлигини таъминлаш ва жиноятчиликка қарши курашиш кирган.

МПХ таркибига маҳалла нозирлари ва уларнинг ёрдамчилари, ёшлар полицияси, мактаб инспекторлари, аёлларни зўравонликдан ҳимоя қилиш бўлимлари, ҳамда экологик ва йўл-патрул полицияси кирган.

МПХ раҳбарлари ҳокимлар ва маслиҳатлар олдида йилига камида икки марта ҳисобот беришлари керак эди, маҳалла нозирлари эса ҳар чоракда ўз участкаси аҳолисига ҳисобот берарди.