Украина 18 ёшдан сафарбарликни бошламоқчи

Украина президенти Владимир Зеленскийнинг таъкидлашича, айрим ғарб давлатлари Россияга қарши санкция жорий этишдан бош тортган сабаблардан бири — Украина 18 ёшдан бошлаб сафарбарлик ўтказмаётганидир. Бу ҳақда у Венгриянинг Válasz Online нашрига берган интервьюсида маълум қилди.

Зеленскийнинг айтишича, у шахсан 18 ёшдаги ёшларни сафарбарликка чақиришни тўғри, деб ҳисобламайди.

«Мен бу ҳақда ҳеч қачон гапирмаганман, лекин агар сўрасангиз, мен айтаман: баъзи мамлакат раҳбарлари ўйлагандек, биз 18 ёшдан сафарбарлик ўтказишимиз шарт, деб ҳисобламайман», — деди Зеленский.

Унинг таъкидлашича, Россиянинг стратегик авиациясини FPV-дронлар ёрдамида йўқ қилишга қаратилган «Ўргимчак тўри» операцияси кўрсатдики, муҳим нарса — бу одамлар сони эмас, балки қурол, технология, маблағ ва санкциялар орқали босимдир.

Зеленский қўшимча қилиб айтдики, Украина 18–24 ёшли ёшларни умумий сафарбарликка жалб этмаган, лекин уларга бир йиллик контракт таклиф қилган — «агар ҳамкорларимиз шунга интилаётган бўлса, улар ҳам хизмат қилишга қодир эканини кўрсатиш имконини бериш учун».

Сафарбарлик ҳақида умумий фикр билдириб, у шундай деди: бу ҳар қандай урушда оғир муаммо, чунки одамлар чарчайди ва можаро тугашини хоҳлашади. Унинг сўзларига кўра, Украина ҳар ойда 27 минггача киши сафарбар этиши мумкин, Россия эса 40–50 минг кишини жалб қилмоқда, чунки уларнинг йўқотишлари анча кўп.

Шунингдек, Зеленский жаҳон етакчиларини Украина қанча вақт чидам бера олади, деган саволни муҳокама қилиш ўрнига, «Путинни тўхтатиш» учун ҳаракат қилишга чақирди. У ҳушдорлик билан таъкидлашича, вазият учинчи жаҳон урушига яқинлашмоқда, ва йирик давлатлар ҳар куни Россия иқтисодиётига санкциялар ва иқтисодий алоқаларни узиш орқали босим ўтказиши кераклигини айтди.