Петро Трампнинг "гиёҳвандлик етакчиси" сўзларига кескин жавоб берди

Колумбия президенти Густаво Петро АҚШ президенти Дональд Трампнинг "Колумбия назоратдан чиқиб кетган" сўзларига жавобан, "Албатта, назоратдан чиқди, лекин унинг (Трампнинг) назоратидан! Демократияда ҳукумат Трампнинг эмас, халқнинг назоратида. У Колумбияда қирол эмас; бу ерда биз қиролларни қабул қилмаймиз, тамом." деди.

Ўз мамлакатидаги хусусий телеканалга гапирган Петро, Трампнинг ўзини "гиёҳвандлик етакчиси" деб аташи ва АҚШ билан "гиёҳвандликка қарши кураш" борасидаги кескинликка тўхталиб ўтди.

Петро, Трампнинг "Колумбия назоратдан чиқиб кетган" сўзларига қуйидагича жавоб берди:

"Албатта, назоратдан чиқди, лекин унинг (Трампнинг) назоратидан! Демократияда ҳукумат Трампнинг эмас, халқнинг назоратида. У Колумбияда қирол эмас; бу ерда биз қиролларни қабул қилмаймиз, тамом. Республикаларда ҳеч ким қиролдек ҳаракат қила олмайди. Бу ерда қиролларнинг боши кесилади, агар қиролча қилиқлар билан келсалар. Ўлим жазоси йўқ, лекин мен мажозий маънода айтяпман: қиролларга итоат этилмайди ва бу ерда қирол ҳеч кимни жим қила олмайди. 21-асрда баъзилар ҳали ҳам ўзларини қирол ёки ҳоким деб ҳисоблайди, лекин республикаларда бу мумкин эмас."

Петро, АҚШнинг Кариб денгизида гиёҳванд модда ташиётганликда гумон қилиб нишонга олган қайиқларини эслатиб, "Биз бу ҳолат бизнинг ҳудудий сувларимизда содир бўлган ёки бўлмаганини текширяпмиз, лекин улар бизга координаталарни беришни хоҳламадилар. Хўш, бунга қарши нима қилиш керак? Давлат раҳбари жим бўлиб тиз чўкиши керакми ёки инсоний қадр-қиммат билан гапириши керакми? Биз барча халқаро органларга мурожаат қиламиз ва миллий суверенитетимизни ҳимоя қиламиз", деди.

АҚШ билан юзага келган дипломатик кескинликда ҳеч қачон ён бермаслигини айтган Петро, "Мен ён бермайман, талаб қиламан. Лекин агар Колумбия аллақачон ҳамма нарсада ён берган бўлса, у энди янада кўпроқ ён бериши шарт эмас", дея изоҳ берди.

Петро, Колумбиянинг АҚШнинг Венесуэлага эҳтимолий босқинига қўллаб-қувватламаслигини таъкидлаб, қуйидагиларни қайд этди:

"Жаноб Трампнинг жаҳлини чиқараётган нарса, мен америкаликларга Колумбия армияси билан Венесуэлага бостириб киришга ёрдам бермаслигимдир. Йўқ, жаноб, қайси аҳмоқ колумбиялик ўз ака-укалари, жиянлари ва тахминан 4 миллион колумбиялик яшайдиган жойни босиб олишга ёрдам беришни ўйлайди? Уларни Ғазода бўлгани каби ўлдириш учунми?"

Шу орада, Петро пойтахт Боготадаги президент саройи "Каса де Нариньо"да АҚШнинг вақтинчалик дипломатик вакили Жон Макнамара билан учрашди.

АҚШ матбуотига кўра, Трамп кеча қилган баёнотида Колумбияни гиёҳванд моддалар ишлаб чиқаришда ва уларни дунёга сотиб, оилаларни заҳарлашда айблаган ва "Колумбия назоратдан чиқиб кетган ва уларда ҳозирча энг ёмон президент (Густаво Петро) бор. У кўплаб муаммолари бор ва ақли жойида бўлмаган бир жинни", деганди.

АҚШ президенти Трамп аввалроқ ҳам Колумбия етакчиси Петрони "ноқонуний гиёҳвандлик етакчиси" деб атаб, Колумбияга бериладиган молиявий ёрдам тўхтатилганини эълон қилган эди.

Трамп, Петронинг мамлакат бўйлаб катта ва кичик миқёсда гиёҳванд моддалар ишлаб чиқаришни рағбатлантираётганини даъво қилиб, Колумбиядаги гиёҳванд моддалар ишлаб чиқариш "мамлакатнинг энг катта бизнеси"га айланганини айтганди.

Петрони гиёҳванд моддалар экилган ерларни ёпишга чақирган Трамп, акс ҳолда АҚШнинг ўз аралашувини амалга оширишини ва бу "хушмуомала" бўлмаслигини айтганди. Президент Петро эса Трампнинг айбловларига "Трамп атрофидаги гуруҳлар ва маслаҳатчилар томонидан алданяпти", деган сўзлар билан жавоб қайтарганди. АҚШ, сентябрь ойида Колумбияни гиёҳвандликка қарши курашда муваффақиятсиз деб топиб, "сертификатланган давлатлар" рўйхатидан чиқарган эди.