АҚШ ва Россия муносабатлари барқарорлашмоқда

Россия президенти Владимир Путин АҚШ билан муносабатлар айрим жиҳатларда барқарорликка эришаётганини билдирди. У АҚШ президенти Дональд Трампга миннатдорлик изҳор этди ва у билан тўғридан-тўғри учрашишга тайёр эканини таъкидлади.

"Умуман олганда, президент Трамп туфайли Россия билан АҚШ ўртасидаги муносабатлар муайян соҳаларда яхшиланишга бошлади. Дипломатик алоқалар тўлиқ йўлга қўйилмаган бўлса-да, дастлабки қадамлар ташланди ва биз олға илгарилаяпмиз", — деди Путин.

У Трампга нисбатан "катта ҳурмат" туйғусини билдириб, яқин кунларда у билан шахсан учрашиш истагини билдирди.

Маълумотларга кўра, икки етакчи икки ҳафта аввал Исроил ва Эрон ўртасидаги таранг вазият, Яқин Шарқдаги инқироз ва Украина уруши юзасидан узоқ телефон суҳбати олиб боришган.

Путиннинг бу баёнотига жавобан, АҚШ президенти Дональд Трамп Оқ уйда журналистлар саволларига жавоб берди. У шундай деди:

"Владимир Путин бугун жуда яхши ва ижобий баёнотлар берди".

Шу билан бирга, Трамп бу каби изҳорлар АҚШнинг собиқ президенти Жо Байден даврида мумкин эмаслигини таъкидлаб, қўшимча қилди:

"Россия мамлакатимизга яна ҳурмат билан қарамоқда. Бир йил аввал эса бундай эмасди, буни аниқ айта оламан".

Россия ва Украина ўртасидаги уруш изчил давом этаётган бир пайтда, Путин Москва Истанбулда ўтказилиши режалаштирилаётган навбатдаги тинчлик музокараларида иштирок этишга тайёр эканини билдирди.

Минскда журналистлар билан суҳбатда у ҳар икки томоннинг музокарачилари доимий алоқада эканини айтди ва:

"Ҳозирча учрашувнинг вақти ва жойи аниқ эмас", — дея таъкидлади.

Путин шунингдек, Россия яна 3 000 нафар украиналик ҳарбий хизматчининг жасадини қайтаришга тайёр эканини маълум қилди.

Трамп эса Путиннинг унга нисбатан айтган ижобий сўзларига Овал офисида шундай жавоб берди:

"Бизда аввал ноқобил президент бор эди. Бу стол атрофида ёмон ниятли одамлар юрарди — айнан шу чиройли ва қатъиятли стол атрофида. Менимча, улар яхшиликни истамасди".

Трамп, шунингдек, Хитой раҳбари Си Цзиньпин ва Корея Халқ Демократик Республикаси етакчиси Ким Чен Ин ҳам унга ҳурмат билан қарайди, деб таъкидлади.

Путин эса, Трамп раҳбарлигида Россия ва АҚШ ўртасида тўғридан-тўғри алоқалар қайта тикланганини таъкидлади. Январда Трамп қайтадан президентлик лавозимига киришганидан буён, икки етакчи беш марта телефон орқали мулоқот қилган.

Путин Трампнинг Украинадаги урушни тугатиш борасида чин дилдан ҳаракат қилаётганига ишонишини билдириб, шундай деди:

"Мен Трампни чуқур ҳурмат қиламан. У ўтган йили суиқасд уринишидан омон қолган, шу жумладан бир қатор жиддий синовларни енгиб ўтган. Трамп Украинадаги низони тугатиш учун ростдан ҳам ҳаракат қилаётганига ишонаман".

Трамп эса ўз навбатида қуйидаги сўзлар билан жавоб қайтарди:

"Владимир Путин бугун жуда чиройли баёнотлар берди. У мамлакатимизга яна ҳурмат билан қарамоқда".