Немис ҳарбийлари Гренландияни шошилинч тарк этди

Даниянинг таклифига биноан НАТО разведка миссияси доирасида 16 январь куни Гренландияга келган Бундесвернинг 15 нафар ҳарбий хизматчидан иборат гуруҳи якшанба, 18 январь куни оролни шошилинч тарк этди. Бу воқеа АҚШ Президенти Дональд Трамп Копенгагенни ҳудудий низода қўллаб-қувватлагани учун Германияга нисбатан божлар жорий этиш билан таҳдид қилганининг эртаси куни юз берди.

Аскарларнинг жўнаб кетгани ҳақида Бундесвер тезкор қўмондонлиги вакили маълум қилди. У миссия муддатидан олдин тўхтатилганини рад этди.

“Разведка миссияси ҳамма мамнун бўлган натижаларни берди ва ҳозирда Германияда ушбу натижалар баҳоланмоқда”, — дейилади хабарда.

“Разведка режага мувофиқ якунланди”, — дея қўшимча қилди ҳарбий мулозим. Унинг сўзларига кўра, немис ҳарбийлари Рейкьявикка учиб кетганлар ва у ердан Копенгагенга йўл оладилар.

“Bild” нашри немис аскарларининг Гренландиядан “махфий ва шошилинч кетиши” ҳақида ёзди. Бироқ кейинроқ таблоид буни рад этиб, ГФР Мудофаа вазирлигининг аниқлик киритган маълумотларини келтирди.

Ушбу маълумотга кўра, 18 январь куни ҳарбийларнинг Гренландия бўйлаб қўшимча сафари режалаштирилган бўлган, аммо об-ҳаво шароити туфайли у бекор қилинган, шу сабабли улар оролни эрталабдаёқ тарк этганлар.

“Bild” ҳисоб-китобларига кўра, Бундесвернинг Гренландиядаги миссияси 44 соат давом этган. Нашрнинг таъкидлашича, оролни тарк этиш ҳақидаги буйруқ 18 январь куни эрталаб Берлиндан келган. Оролда бўлиб турган ҳарбий хизматчиларга ҳеч қандай изоҳ берилмаган.

“Deutschlandfunk” радиостанцияси эслатишича, дастлаб ГФР Мудофаа вазирлиги Бундесвернинг Гренландиядаги разведка миссияси муддатини 15–17 январь деб эълон қилган эди. Аммо шанба куни миссиянинг аниқ давомийлиги белгиланмаганига аниқлик киритилди.

Бир кун аввал Трамп 2026 йил 1 февралдан бошлаб Дания, Норвегия, Швеция, Франция, Германия, Буюк Британия, Нидерландия ва Финляндияга нисбатан 10 фоизлик бож жорий этилишини эълон қилди ва 1 июндан тариф 25 фоизгача кўтарилиши ҳақида огоҳлантирди. Америка етакчиси Гренландияни сотиб олиш бўйича келишувга эришилгунга қадар улар ушбу божни тўлашларини тушунтирди.

Бир қатор Европа давлатлари ҳарбийлари ўқув машғулотлари ўтказиш ва қўшинларни келажакда жойлаштириш имкониятларини ўрганиш учун Гренландияга келган эдилар. Ҳарбийлар чоршанба куни Вашингтонда Дания, Гренландия ва АҚШ Ташқи ишлар вазирларининг учрашуви муваффақиятсиз якунланганидан сўнг юборилган эди.

Даниянинг Гренландиядаги Арктика бирлашган кучлари қўмондонлиги раҳбари Сёрен Андерсен таъкидлаганидек, НАТО таркибидаги Европа давлатларининг Гренландиядаги ҳарбий машғулотлари яна бир неча ой давом этади.

“Ҳозирда биз 2026 йил давомида ва эҳтимол 2027 йилгача узлуксиз давом этадиган узоқ муддатли машғулотларни режалаштирмоқдамиз”, — деди у.

Унинг сўзларига кўра, АҚШ ҳам, НАТОнинг барча давлатлари каби, машғулотларга таклиф қилинган. Ҳозирги вақтда машғулотлар ўтказилаётган жойда фақат француз аскарлари қолмоқда. Бошқа мамлакатлар вакиллари эса имкониятларни баҳолаш учун келган эдилар, деб қайд этди генерал.