Пудратчини топиб устунга боғлашни буюрди

Қирғизистон Миллий хавфсизлик давлат қўмитаси (ГКНБ) раиси Қамчибек Ташиев милицияга Норин шаҳридаги Ленин кўчасида 9,5 километр йўл қурилишини ҳалигача якунламаган “Бета групп” қурилиш компанияси раҳбарини зудлик билан топишни буюрди.

Ташиев билан учрашувда Қирғизистон транспорт ва коммуникациялар вазири Абсаттар Сиргабаев ушбу объект пудратчиси айнан “Бета групп” эканини маълум қилди.

Ташиев шундай деди:

"‘Бета групп’ фаолиятини текширинг. Бу — ИИВга топшириқ. Транспорт вазирлиги қанча маблағ ажратган, қайси кўчаларга, қаерга сарфланган, самарадорлигини аниқланг. Зудлик билан. ИИВ бошлиғи, шахсан назоратга олинг. Техника қандай ишлаяпти — текширинг. Айтишларича, улар бу кеча иш бошлабди, мен келаётганимни эшитгач. Компания раҳбарини топинг, Бишкекда бўлса ҳам, Норинда бўлса ҳам. Агар бу ерда топа олмасангиз, Бишкекдаги ҳамкасбларингизга топшириқ беринг. Улар топсин, машинанинг ичига солиб олиб келсин. Келиб устунга боғланг. Куну тун шу ерда турсин. Ҳатто овқат ҳам берманг, устунга боғлаб қўйинг".

Давлат хавфсизлик хизмати раҳбари ишини бажармаган бошқа пудратчилар ва тендер ўтказган вазирлик ходимларига нисбатан ҳам чора кўришни талаб қилди.

Кейинчалик Ташиев яна қўшимча қилди:

"Пудратчини топинг, ақлига келтиринг. Ҳеч кимдан ‘криша’ (ҳимоячи) сўраб ўтирманг. Дарҳол чора кўринг, керак бўлса, ҳибсга олинг. Ягона ‘криша’ — қонун бўлиши керак. Агар орқасида кимдир турса, айтинглар, ўша ‘криша’ни йўқ қиламиз".

Аввалроқ Ташиев мамлакат президенти Садир Жапаров ҳақида айтган сўзлари учун сиёсатчи, Жогорку Кенеш (парламент)нинг собиқ депутати Адахан Мадумаровни таҳдид билан танқид қилган эди.

"Биз интизомсизларни жавобгарликка тортишимиз керак. Президент куну тун ишлаяпти, биз буни бошқаларга кўрсатишимиз керак. Бу Мадумаров яна оғзи билан ўзига зарар етказади. Айтган гаплари туфайли парламентдан кетди, халқдан узилди", — деди Ташиев.