Жиноий гуруҳлар ортида вазир тургани фош этилди

Жанубий Африкада ички ишлар вазири Сензо Мчуну жиноий тузилмалар билан ҳамкорлик қилгани ва баъзи терговларга тўғридан-тўғри аралашгани айблови билан вақтинча лавозимидан четлатилди.

Президент Сирил Рамафоса халққа қилган мурожаатида, мамлакат ҳуқуқни муҳофаза қилувчи органларига жиноий гуруҳлар сингиб киргани ҳақида кенг қамровли суриштирув бошланганини эълон қилди.

Унинг сўзларига кўра, Квазулу-Натал полиция бошлиғи генерал Нҳланхла Мкҳванази вазир Мчуну жиноий гуруҳлар билан алоқадор шахслар билан ҳамкорлик қилганини ва бу гуруҳлар юзасидан тергов олиб бораётган махсус гуруҳни тарқатганини маълум қилган.

Президент Рамафоса бу айбловлар конституция, қонун устуворлиги ва миллий хавфсизлик нуқтаи назаридан жиддий хавотир уйғотишига эътибор қаратди. Терговни холис ва мустақил равишда олиб бориш мақсадида махсус суд комиссияси тузилди. Комиссия иши давомида Мчуну вақтинча лавозимидан олинди.

Унинг ўрнини вақтинча Фироз Качалия, Миллий коррупцияга қарши кураш кенгаши раиси эгаллайди.

Мчуну эса бу қарорни ҳурмат билан қабул қилганини ва ўзини оқлашга тайёр эканини билдирди.

Мкҳваназининг баёнотига кўра, вазир Мчуну сиёсий сабабларга кўра содир этилган 121 та қатл ишини тергов қилаётган Сиёсий қатллар бўйича махсус гуруҳни тарқатишда бевосита иштирок этган. Шунингдек, Гаутенг вилоятидаги бошқа тергов натижаларида сиёсатчилар, тадбиркорлар, полиция раҳбарлари ва судьялар аралашган кўп қатламли жиноий тузилма фош этилган.