Испаниянинг жанубида оммавий тартибсизликлар авж олди

Испаниянинг Мурсия вилоятидаги Торре-Пачеко шаҳрида маҳаллий аҳоли ва муҳожирлар ўртасидаги тўқнашувлар икки кундирки давом этмоқда.

11 июль куни 500 га яқин одам қатнашган митинг вақтида тартибсизликлар бошланди. Норозиликларга сабаб — ўз уйи яқинида сайр қилиб юрган 68 ёшли эркакка қилинган ҳужум бўлди. Жабрланувчининг сўзларига кўра, унга бир нечта ёш йигит, тахминан, Марокашдан келган муҳожирлар томонидан ҳужум қилинган.

12 июль куни ҳам мигрантларга қарши шиорлар билан намойишлар давом этди. Мурсия ҳокимияти вакили Мариола Геваранинг айтишича, полицияга ҳужум қилганлик айби билан бир киши қўлга олинган.

«Бу ҳолат икки гуруҳ ўртасидаги тўқнашувга ўхшади. Гражданлик гвардияси уларнинг ўртасида туриб, салбий оқибатларнинг олдини олишга ҳаракат қилди», — деди у TVE телеканалига берган интервьюсида.

Шаҳар мэри Педро Анхель Рока эса протестларда қатнашганлар орасида Торре-Пачеко аҳолиси бўлмаган, атайлаб келган шахслар ҳам борлигини таъкидлади:

«Жиноятчиликка зўравонлик билан қарши туриш иложсиз. Бундай йўл билан ҳеч нарсага эриша олмаймиз», — деди у.

Мурсия вилояти раҳбари Фернандо Лопес Мирас эса ҳужумларда айбдор бўлганларнинг барчаси жавобгарликка тортилиши кераклигини билдирди:

«Мен жамоатчиликнинг кўнгли қолганини тушунаман, бироқ биз хавфсизлик кучлари ва қонунга ишонишимиз керак», — деди у.

Испания ОАВ маълумотига кўра, Торре-Пачекода 40 мингга яқин одам яшайди, уларнинг учдан бири Шимолий Африкадан келган муҳожирлардир.