Марсдан тушган метеорит рекорд нархда сотилди

Марсдан келгани айтилган ва Ерга тушган энг йирик метеорит АҚШда ўтказилган аукционда рекорд нархда харидор топди.

АҚШнинг Нью-Йорк шаҳридаги “Sotheby’s” аукцион уйи томонидан ўтказилган савдода Марсдан келгани таъкидланган, 25 килограмм оғирликдаги NWA 16788 метеорити учун сўнгги таклиф 4,3 миллион доллар бўлди. Комиссия ва қўшимча тўловлар билан бирга сотув нархи 5,3 миллион долларга етди.

“Sotheby’s” мутахассисларининг айтишича, ушбу парчанинг Марсдан келгани махсус лаборатория тестлари билан тасдиқланган. Уни ташкил этувчи кимёвий моддалар 1976 йили Марсга қўнган “Viking” зонд аппарати томонидан текширилган намуналар билан мос келади.

“Sotheby’s” табиий тарих бўлими вице-президенти Кассандра Хаттон рекорд нархда сотилган метеорит ҳақида шундай деди:

«Бу парча Марсдан келган энг йирик метеорит ва ҳозиргача топилганлар орасида энг тўлиқ намуна. Олдинги энг катта метеоритдан икки баравар катта », — деди у.

2023 йилда Нигернинг Саҳро чўли ҳудудида бир метеорит қидирувчиси томонидан топилган ушбу тош катта астероиднинг Марс юзасига урилиши натижасида ажралиб чиққан ва тахминан 225 миллион километр масофани босиб ўтиб Ерга етиб келган.

Мутaxассислар ушбу йирик метеорит юқори ҳарорат ва босим таъсирида баъзи жойлари шиша каби массаларга айланганини таъкидлаб, Марс юзасига урилиш натижасида Ерга етиб келганини қайд этмоқда.