Тўрт йил ичида бешинчи уриниш

Грузияда 4 октябрь куни сўнгги тўрт йил ичида бешинчи марта инқилоб уриниши содир бўлди. Бу ҳақда Грузия бош вазири Ираклий Кобахидзе “Рустави-2” телеканали эфирида маълум қилди.

Ҳукумат раҳбарининг таъкидлашича, ҳокимият бундай ҳолатларни келгусида олдини олиш учун зарур бўлган барча чораларни кўради.

“Бу — ташқи кучлар қўллаб-қувватлаган бешинчи инқилоб уриниши эди… Энди энг асосий вазифамиз — олтинчи уринишга йўл қўймаслик. Бунинг учун барча зарур чоралар кўрилади”, — деди Кобахидзе телеканал орқали чиқишида.

Кобахидзе таъкидлашича, ҳозир ҳукумат айбдорлар ва жиноятчиларни аниқлаш учун анча кўп имконият ва ресурсларга эга. Шунинг учун норозилик намойишларида иштирок этганлар ва уларни ташкил этганлар тегишли жавобгарликка тортилишини кутиши керак.

Бош вазирнинг сўзларига кўра, мамлакатда вазият барқарор, ҳукумат дестабилизация уринишларига қарамай, назоратни қўлдан бой бермаган. Ҳокимият органлари норозиликларни ташкил этган шахсларнинг ҳаракатларини таҳлил қилмоқда ва тартибни таъминлаш учун ҳуқуқни муҳофаза қилиш тузилмалари билан ҳамкорлик қилмоқда.

Кобахидзе, шунингдек, ҳукумат миллий хавфсизликни мустаҳкамлаш ва хорижий давлатларнинг мамлакат ички ишларига аралашувининг олдини олиш бўйича изчил иш олиб бораётганини қайд этди.

Ҳозирда президент саройига бостириб киришни уюштирганларни қўлга олиш бўйича махсус операция ўтказилмоқда.

Кейинроқ “Рустави-2” телеканали хабарига кўра, Грузия Ички ишлар вазири ўринбосари Александр Дарахвелидзе билдирганидек, ҳозирга қадар жиноят билан боғлиқ 15 киши аниқланган. Улардан 13 нафари қўлга олинган, яна икки нафари қочиб юрибди.

Ички ишлар вазирлиги, шунингдек, гумондорлардан бири уйидан қурол-яроғ сақланган яширин жой топилганини маълум қилди.

Эслатиб ўтамиз, Тбилиси марказидаги норозилик намойишлари маҳаллий сайловлар фонунда бошланган эди. Намойишчилар амалдорларга, хусусан, ҳозирги бош вазир ва ҳукмрон партия раҳбари Ираклий Кобахидзега Россия билан алоқалари учун қарши чиққан.

4 октябрь куни норозилик иштирокчилари Грузия президенти резиденцияси ҳовлисига кириб боришган. Намойиш ташкилотчилари қўмитасининг беш аъзоси қўлга олинган.

Умуман олганда, Грузияда норозиликлар тахминан бир йилдан бери давом этмоқда. Намойишчилар янги парламент сайловларини ўтказишни талаб қилмоқда.