Трамп монтажи BBCни ларзага солди

BBC Бош директори Тим Дэви ва Хабарлар департаменти бош ижрочи директори Дебора Тернесс Трамп ҳақидаги ҳужжатли фильмдаги монтаж можаросидан сўнг истеъфога чиқди. Ҳужжатли фильмда Конгрессга бостириб киришдан олдин Трампнинг сўзлари асл контекстидан ажратилиб, эфирга узатилган эди.

Британиянинг жамоат телерадиокомпанияси BBC Бош директори Тим Дэви ва Хабарлар департаменти бош ижрочи директори Дебора Тернесс, ўтган йили эфирга узатилган АҚШ президенти Дональд Трамп ҳақидаги ҳужжатли фильмда 2021 йилги Конгрессга бостириб кириш билан боғлиқ иборалар асл контекстидан ажратилиб, монтаж қилингани аниқланганидан сўнг истеъфога чиқди.

"The Telegraph" газетаси монтаж ҳақиқатини фош қилганидан сўнг, Дэви BBC'даги 20 йиллик фаолиятидан сўнг истеъфога чиққанини эълон қилди.

Ёзма баёнотида: "Барча муассасалар каби, BBC ҳам мукаммал эмас. Биз очиқ, шаффоф ва ҳисобдор бўлишимиз керак", деган иборани қўллаган Дэви, истеъфога чиқиш учун кўп сабаблари борлигини, лекин BBC'нинг янгиликлар канали BBC News'да эфирга узатилган Трамп ҳақидаги ҳужжатли фильм асосий омил бўлганини таъкидлади.

Дэви: "Умуман олганда, BBC яхши иш олиб бормоқда. Аммо баъзи хатоларга йўл қўйилди ва бош директор сифатида бутун масъулиятни ўз зиммамга олишга мажбурман", дея баҳо берди.

BBC Бошқарув кенгаши раиси Самир Шаҳ Дэви ва Тернесснинг истеъфога чиққанини эълон қилди.

Ушбу икки шахснинг BBCга муҳим ҳисса қўшганини ифода этган Шаҳ: "Бу BBC учун қайғули кун", деган сўзни айтди. Шаҳ, бошқарув кенгаши сифатида ушбу қарорни ва унинг сабабларини ҳурмат билан қабул қилганларини маълум қилди.

"The Telegraph"нинг 3 ноябрдаги хабарига кўра, BBC News'да эфирга узатилган "Panorama" дастурида 2024 йил 28 октябрда кўрсатилган "Трамп: Иккинчи имконият?" номли ҳужжатли фильмда Трампнинг 2021 йилги Конгрессга бостириб киришдан олдин сўзлаган иккита турли нутқи ўрин олган эди.

АҚШ президентлик сайловидан бир ҳафта олдин эфирга узатилган ҳужжатли фильмда BBC'нинг бу иккита турли нутқни бирлаштириб, ягона нутқ сифатида намойиш этгани кўринган ва монтаж натижасида Трамп ўз тарафдорларига "Конгрессга юринг ва курашинг" деган хабарни етказгандек тасаввур ҳосил бўлган эди.

Асл нутқдаги тинч йўл билан норозилик билдириш ҳақидаги иборалар эса BBC ҳужжатли фильмидаги бирлаштирилган нутқдан олиб ташланган эди.

Воқеа BBC Бошқарув Кенгашига тақдим этилган 19 саҳифалик ҳисобот билан ошкор бўлган эди.