“Энди давлат тўнтариши бўлмайди”

Қирғизистон Президенти Садир Жапаров якшанба куни халққа мурожаат қилиб, ҳокимият энди давлат тўнтаришларига сабаб бўлмаслигини билдирди.

Давлат раҳбари ижтимоий тармоқларда пост эълон қилди. Унинг сўзларига кўра, "яхши ниятли бўлмаган", "муаммоларни бўрттириб кўрсатадиган", "уларни кескинлаштирадиган", одамларни қўзғатадиган ва сайлов пайтида "нимадир содир бўлишига" умид қиладиган гуруҳлар бор.

"Улар орасида аввал йирик коррупцион ишлар бўйича ҳибсга олинган ва суд қарори билан катта миқдордаги пул ёки объектларни давлат бюджетига ўтказган шахслар; биз уларнинг ноқонуний схемаларини бузиб, даромадларидан маҳрум қилган шахслар; лавозимлардан кетиб, ўз манфаати учун қасд олаётганлар бор. Бошқача айтганда – шахсий манфаат йўлида хафа бўлган одамлар", – деди Жапаров.

Шу муносабат билан Қирғизистон президенти "баъзи ватандошларни тартибсизликларга умид қилмасликка" чақирди.

"Биринчидан, биз тўнтаришга сабаб бўлмаймиз. Иккинчидан, аввалги заиф давлат энди йўқ. Энди давлат кучли. Учинчидан, халқ кимни қўллаб-қувватлаш ва ким ҳокимиятда бўлиши кераклигини яхши билади. Бундан буён тўнтаришларни фақат тушингизда кўрасиз. Талончилик, ўғирлик, очкўзлик билан даромадга интилиш ва аввалгидек тўнтаришдан кейин лавозимга эришиб бойишга уриниш – буларнинг барчаси фақат тушингизда қолиб кетсин", – деди Жапаров.

Халққа йўллаган мурожаатида давлат раҳбари, шунингдек, мамлакатда энди ҳайдовчилик гувоҳномасини сотиб олиб бўлмаслигига ваъда берди.

"Бундан буён коррупция бўлмайди! Пулга гувоҳнома сотиб олиш мумкинлигини унутинг. Энди ҳайдовчилик гувоҳномалари фақат билим, меҳнат ва виждонийлик орқали олинади. Ҳар бир киши бунга ўз билими ва тинимсиз саъй-ҳаракатлари билан эришиши керак", – деди у.