Пентагондаги лавҳалар ўзгартирилди

АҚШ Мудофаа Вазирлиги (Пентагон) биносидаги лавҳалар, Вазирлик номининг ўзгартирилишига оид сентябр ойида имзоланган президентлик қарори ортидан "Уруш Вазирлиги" деб ёзилган бронза лавҳалар билан алмаштирилди. АҚШ Мудофаа вазири Пит Хегсетҳ лавҳани шахсан ўрнатиб, Мудофаа Вазирлиги номининг ўзгартирилиши масаласида жуда жиддий эканликларини билдирди.

Пентагондан берилган маълумотга кўра, АҚШ Президенти Доналд Трамп сентябрда имзолаган қарорнома билан Вазирлик номини қайтадан "Уруш Вазирлиги" этиб ўзгартириш таклиф қилинган. Бинонинг икки кириш эшигидаги эски бронза лавҳалар олиб ташланди ва ўрнига “АҚШнинг уруш қудратини бошқарувчи федерал муассасанинг янги номини акс эттирувчи” лавҳалар ўрнатилди.

Вазирликнинг ижтимоий тармоқларда тарқатилган видеоларида АҚШ Мудофаа вазири Пит Хегсетҳнинг "Уруш Вазирлиги" деб ёзилган бронза лавҳалардан бирини шахсан мослама билан ўрнатгани кўринади.

Хегсетҳ: "Эски лавҳаларни алмаштиргимиз келди, чунки бу эшикдан кирадиган ҳар бир киши бу ташкилот номининг ўзгартирилишига қанчалик жиддий ёндашaётганимизни билсин," — деди.

АҚШ Конституцияси кучга кирган 1789 йилда ташкил этилган Уруш Вазирлиги Иккинчи Жаҳон уруши тугаганидан икки йил ўтгач, 1947 йилда қабул қилинган қонун билан Мудофаа Вазирлиги деб қайта номланган эди.

Трамп сентябр ойида Вазирлик номини "Уруш Вазирлиги" деб ўзгартиришни назарда тутувчи президентлик қарорномасини имзолаган ва бу ўзгариш учун зарур ҳуқуқий тартиб-таомилларни амалга ошириш мақсадида Конгресга мурожаат қилишларини айтган эди.