Гонконгда турар жой комплекси кулга айланди

Хитойнинг Гонконг Махсус Маъмурий Ҳудудининг Тай По туманида кеча 8 та кўп қаватли уйдан иборат турар жой комплексида чиққан ёнғинда 44 киши ҳалок бўлгани, 279 кишидан эса ҳамон дарак йўқлиги хабар қилинди. Тахминан 4 мингга яқин киши яшайдиган комплексда аланга қамраб олган 7 та уйнинг 3 тасида ёнғин назоратга олинган, 4 та бинода эса ўт ўчириш ишлари давом этмоқда.

Хитойнинг Гонконг Махсус Маъмурий Ҳудудининг Тай По туманида кеча 8 та кўп қаватли уйдан иборат комплексда чиққан ёнғинда ҳалок бўлганлар ва жароҳатланганлар сони соат сайин ортиб бормоқда. Кеча тушдан кейин 1900 дан ортиқ хонадон жойлашган комплексда бошланган ёнғин, биноларнинг таъмирланиши учун ташқи деворга ўрнатилган бамбук ишқобастлар сабабли тез тарқалган. Маҳаллий ўт ўчириш хизматининг баёнотига кўра, ёнғинда ҳозиргача орасида бир ўт ўчирувчи ҳам бўлган 44 киши ҳалок бўлган. Жароҳатланиб касалхонага ётқизилганлардан 45 кишининг аҳволи оғирлигича қолмоқда.

Тахминан 4 мингга яқин киши яшайдиган комплексда аланга қамраб олган 7 та уйнинг 3 таси назоратга олинган, 4 та бинода ёнғин давом этмоқда. 279 кишидан ҳамон дарак бўлмагани ҳолда, 26 та ўт ўчириш гуруҳи ёнғинни ўчириш ишларини давом эттирмоқда.

Хавфсизлик идоралари ёнғинга алоқадорлиги учун комплексдаги таъмирлаш ишларини олиб борган қурилиш компаниясининг икки нафар директори ва маслаҳатчи муҳандисни "эҳтиётсизлик оқибатида одам ўлдириш" гумони билан ҳисбга олди. Таъмирлаш туфайли биноларга ўрнатилган бамбук ишқобастлар ва дерезаларни қоплаган пластик кўпик материал ёнғиннинг тез тарқалишида самарали рол ўйнагани айтилмоқда.

Полиция Бош инспектори Эйлин Чунг Лаи-йи қуйидагича баёнот берди: "Бизда компаниянинг масъул шахслари воқеада жиддий бепарволикка йўл қўйганлиги ва бунинг ёнғиннинг тез тарқалишига ҳамда кўплаб қурбонларга сабаб бўлганлигига доир асослар мавжуд".

Хавфсизлик вазири Крис Танг ҳам баёнот бериб, дастлабки текширувлар ёнғиннинг ғайриоддий даражада тез тарқалганини кўрсатганини ва бунга кўпинча пластик кўпик изоляция материаллари сабаб бўлганини таъкидлаб, "Бино деворларини қоплаган материалнинг, ишқобастларни ўраб турган тўрларнинг ва сув ўтказмайдиган брезентнинг ёнганида аланга стандартларга мос материаллардагидан тезроқ тарқалганини кўрдик", деди.

Ёнғинларнинг шиддати учун 5 босқичли баҳолаш тизими қўлланиладиган Гонконгда, 17 йилдан кейин биринчи марта 5-даражали огоҳлантириш эълон қилинди. Расмийлар атрофдаги яна иккита турар жой комплекси эвакуация қилинганини ва ташкил этилган 8 та вақтинчалик бошпанага ёнғиндан зарар кўрган 900 га яқин ватандош жойлашганини маълум қилдилар. Расмийлар 140 дан ортиқ ўт ўчириш машинаси ва 800 дан зиёд соғлиқни сақлаш ҳамда ўт ўчириш ходимлари воқеа жойига юборилганини қайд этдилар. Транспорт вазирлигининг баёнотида ёнғин сабабли атрофдаги йўлларнинг транспорт ҳаракати учун ёпилгани билдирилди.

Хитой президенти Си Цзиньпин ёнғинда ҳалок бўлганлар учун Гонконг ҳукуматига таъзия билдирар экан, Пекиннинг Гонконг ва Макао ишлари бўйича идорасига маҳаллий ҳукуматга ёнғинга қарши курашда ёрдам кўрсатиш бўйича кўрсатма берди. Гонконг Бош ижрочиси Жон Ли Ка-чиу кўплаб инсонларнинг ҳалок бўлишига ва жароҳатланишига сабаб бўлган ёнғин туфайли чуқур қайғуда эканлигини билдириб, ҳалок бўлганларнинг оилаларига таъзия, жароҳатланганларга тезроқ тузалиб кетишларини тилади. Ли ёнғинга оид ишларни мувофиқлаштириш учун ўз вазирлар маҳкамаси билан фавқулодда йиғилиш ўтказди.