АҚШ расман ватандошликни сотишни бошлади

АҚШ ватандошлиги ҳукуматнинг "Олтин карта" расмийлаштириш сайти — The Trump Gold Card орқали сотиб олиш учун таклиф қилинмоқда. Аввалроқ Президент Дональд Трамп сайтнинг очилганини эълон қилаётганда, уни ватандошликка тез эришиш йўли деб атаган эди.

Дастурда ҳар қандай хоҳловчи қатнашиши мумкин, аммо амалда бир миллион доллар эвазига доимий яшаш рухсатномасини фақат таъминланган хорижликлар олиши мумкин.

Сайтда айтилишича, Ички хавфсизлик вазирлиги хизматлари учун 15 минг доллар тўлаш керак. Текширув ва бир миллион доллар бадал тўлангандан сўнг, "Трампнинг Олтин картаси" орқали тезда доимий яшаш рухсатномасини олиш мумкин. Бу жараённинг ўзи бир неча ҳафтани ташкил этади.

Расмийлаштириш пайтида шахсий ва молиявий маълумотларни кўрсатиш зарур. Лекин сайтда огоҳлантирилади: агар хавфсизлик учун хатарлар пайдо бўлса, карта бекор қилиниши мумкин.

"Қўшма Штатлардан ташқарида олинган даромадлар учун АҚШда ҳеч қачон солиққа тортилган шахслар (АҚШ ватандошлари ва доимий яшаш рухсатномасига эга хорижликлар) Trump Platinum Card картасига ариза топширишга ҳақли эмаслар", — дейилади сайтда.

Айтганча, аризани кўриб чиқиш учун 15 минг долларлик тўлов қайтарилмайди.

Шунингдек, тез орада "Платина карта"ни ишга тушириш ваъда қилинмоқда. Унинг ёрдамида 5 миллион доллар бадал эвазига йилига 270 кунгача АҚШда солиқ тўламасдан яшаш мумкин бўлади.

Аввалроқ Трамп яна АҚШда туғилиш орқали ватандошликни бекор қилишга ҳаракат қилган эди. Бу мамлакатда ноқонуний ёки вақтинчалик мақомга эга бўлган хорижликлардан туғилган болаларнинг ватандошлик ҳуқуқидан маҳрум қилинишига тегишли эди.