Футбол мухлислари ЖЧ-2026га бойкот эълон қилди

Англиялик футбол мухлислари чипталарнинг нархи жуда юқорилиги туфайли 2026 йилги Жаҳон Чемпионатига чипта сотиб олмасликка чақирдилар.

Манбанинг хабар беришича, мухлислар Англия Футбол Ассоциацияси раиси ва бош директорига чора кўриш талаби билан хат юборганлар.

2026 йилда Мексика, АҚШ ва Канадада бўлиб ўтадиган футбол бўйича жаҳон чемпионати чипталарининг нархлари мухлисларни ҳайратда қолдирди.

Манбага кўра, англиялик мухлислар учун жаҳон чемпионати финалига энг арзон чипталар 3128 фунт стерлингни (2,1 миллион тенге) ташкил этади.

Эслатиб ўтамиз, 2026 йилги Жаҳон Чемпионати мусобақа тарихидаги энг каттаси бўлади. Одатдаги 32 та терма жамоа ўрнига АҚШ, Канада ва Мексика майдонларида 48 та миллий жамоа ўйнайди.

Бугунги кунга қадар 42 та иштирокчи маълум – мусобақа мезбонлари ўз ўринларини автоматик равишда қўлга киритишди. Қолган олтита йўлланма 2026 йилнинг баҳорида ўйналади: тўрттаси Европа плей-офф ўйинларида, иккитаси қитъалараро плей-оффда.

Турнир 2026 йил 11 июнда Мексиканинг Мехико шаҳридаги "Ацтека" стадионида бошланади. Майдонга Мексика ва Жанубий Африка чиқади. Жаҳон чемпиони 2026 йил 19 июлда аниқланади. Ҳал қилувчи ўйин Ист-Ратерфорддаги (Нью-Йорк, АҚШ) "Метлайф" стадионида бўлиб ўтади.

Яқинда турнирга қуръа ташлаш маросими бўлиб ўтганини эслатиб ўтамиз.