Австралияда кучли сув тошқини юз берди

Австралия жанубидаги Виктория штатида кузатилган кучли ёғингарчилик оқибатида юзага келган тошқинлар кундалик ҳаётни издан чиқарди. “Great Ocean” автомобиль йўли бўйлаб тўхтаб турган кўплаб транспорт воситалари денгизга оқиб кетди, минглаб одамлар эвакуация қилинди. Бошидан кечирган оғир дақиқалар ҳақида гапирган фуқаролардан бири: “Бу ерда вазият жуда чалкаш, одамлар оила аъзоларини топишга ҳаракат қилмоқда. Ҳамма нарсамиздан айрилдик”, — дея таъкидлади.

Австралиянинг жануби-ғарбий қисмига ёпирилган кучли бўрон ва жала қуйиши тошқинларга сабаб бўлди. Австралия матбуоти хабарларига кўра, “Great Ocean” йўлида содир бўлган тўсатдан тошқин туфайли тўхтаб турган кўплаб машиналар денгизга оқиб кетгани ва сув остида қолгани акс этган лавҳалар ижтимоий тармоқларда тарқалди.

“Wye River” туризм ҳудудидаги тўсатдан сув босиши сабабли юзлаб кишилар дам олиш масканларидан эвакуация қилинди. “Wye River”, “Kennett River”, “Cumberland River”, “Lorne” аҳоли пунктлари ва уларнинг атрофида яшовчи аҳоли учун фавқулодда ҳолат огоҳлантируви эълон қилинди.

“Mount Cowley” ҳудудида сўнгги 7 соат ичида 2000 йилдан бери қайд этилган энг юқори ёғингарчилик миқдори кузатилди.

“The Sun” нашрига гапирган Капогреко исмли маҳаллий аҳоли вакили: “Бу ерда вазият жуда оғир, одамлар ўз оила аъзоларини қидиришмоқда, бу ҳақиқатан ҳам қўрқинчли. Бор-будимиздан айрилдик, уй-вагонлар ва машиналар сув устида оқиб кетаётганини кўряпмиз, бу жуда аянчли ҳолат. Бир-бирини танимайдиган инсонлар бир-бирини қучоқлаб тасалли бермоқда”, — деди.