Колумбия президенти Петродан Мадуро бўйича чақириқ

Колумбия президенти Густаво Петро, АҚШ томонидан 3 январь куни ҳарбий аралашув натижасида қўлга олинган Венесуэла президенти Николас Мадурони ўз мамлакатига қайтариш кераклигини айтди.

Колумбия пойтахти Боготада матбуотга баёнот берган Петро АҚШнинг Венесуэладаги ҳарбий ҳаракатларини танқид қилди ва Мадурони экстрадиция қилиш чақириғини такрорлади.

“Николас Мадурони ўз юртига қайтаришлари керак. У Америка суди томонидан эмас, Венесуэла суди томонидан судланиши лозим”, — деди Петро.

АҚШнинг 3 январдаги Венесуэлага қилган ҳаво ҳужумини ёдга олган Петро: “Каракасни бомбардимон қилиш нафақат Мадурога қарши, балки тўғридан-тўғри Венесуэлага қаратилган ҳаракатдир. Бундай нарса қандай қилиб уларнинг хаёлига келиши мумкин? Боливар ватанини бомбалаш — бу доғдир. Мадуро АҚШ қамоқхоналарида вафот этган тақдирда ҳам, бу фақат у билан чекланиб қолмайди, балки тарихий доғ бўлиб қолади ва ҳеч қачон унутилмайди”, — дея таъкидлади.

Бирлашган Миллатлар Ташкилоти халқаро инқирозларни ҳал қилишда ожиз қолаётганини қайд этган Петро, Ғазодаги урушни тўхтата олмаган ушбу ташкилот “инқироз” жараёнида эканини айтди.

Боготадаги Боливар майдонида қилган тарихий нутқига ишора қилиб, Петро АҚШ президенти Дональд Трампга нисбатан аслида анча қаттиқроқ ифодалар ишлатмоқчи бўлганини, бироқ февраль ойидаги Оқ уй учрашуви сабабли нутқини юмшатганини тан олди.

Эслатиб ўтамиз, 3 январь куни маҳаллий вақт билан соат 02:00 атрофида Венесуэла пойтахти Каракасда портлаш ва самолёт товушлари эшитилган эди. Венесуэла раҳбарияти портлашлардан сўнг АҚШни мамлакатнинг турли ҳудудларидаги аҳоли ва ҳарбий объектларга ҳужум қилишда айблади.

АҚШ президенти Дональд Трамп Венесуэла президенти Мадурога қарши кенг кўламли ҳужум уюштирилганини, Мадуро ва унинг рафиқаси мамлакатдан олиб чиқилганини эълон қилган эди.

АҚШ Адлия вазири Пам Бонди эса Мадуро ва унинг рафиқаси Силия Флоресга нисбатан АҚШда жиноий иш қўзғатилганини, Мадурога “наркотерроризм, кокаин контрабандаси, АҚШга қарши пулемёт ва вайронкор қурилмаларга эгалик қилиш” айбловлари қўйилганини маълум қилди.

Венесуэла ҳукумати халқаро ҳамжамиятни АҚШни қоралашга чақирди; баъзи давлатлар ҳужумни танқид қилган бўлса, АҚШни қўллаб-қувватлаганлар ҳам бўлди.