УЕФА президенти сайлови Қозоғистонда ўтказилади

Бугун Европа футбол ассоциациялари иттифоқининг (УЕФА) 50-конгрессида навбатдаги конгресс 2027 йилда Астанада ўтиши эълон қилинди.

Ушбу тадбир сўнгги йиллардаги Европа футболининг энг муҳим воқеаларидан бирига айланади. Қозоғистон футбол федерациясининг (ҚФФ) хабар беришича, айнан Астанада ташкилотнинг навбатдаги раҳбари сайлови бўлиб ўтади.

“УЕФА конгресси Европа футболининг олий раҳбарий органи ҳисобланади ва ҳар йили 55 та миллий ассоциация вакилларини бирлаштиради. Тадбир доирасида Европада футболнинг стратегик ривожланишини белгиловчи асосий қарорлар қабул қилинади, молиявий ва ташкилий масалалар тасдиқланади, халқаро мусобақаларни ўтказиш масалалари кўриб чиқилади, шунингдек, УЕФАнинг раҳбарий органлари сайланади.

Таъкидлаш жоизки, 51-конгресс сайловли бўлади. Йиғилиш давомида УЕФА президенти, шунингдек, ташкилот Ижроия қўмитаси аъзолари сайлови бўлиб ўтади. Шундай қилиб, айнан Қозоғистонда Европа футболининг яқин йиллардаги ривожланиш йўналишини белгиловчи қарорлар қабул қилинади.

Конгрессни ўтказиш ҳуқуқи УЕФАга аъзо мамлакатларга ишонч белгиси ва уларнинг футбол ривожига қўшган ҳиссаси эътирофи сифатида берилади. 51-конгресснинг ўтказилиши Қозоғистонда шу пайтгача ўтказилган энг йирик халқаро футбол тадбирларидан бири бўлади ва мамлакатнинг Европа футбол ҳамжамиятидаги мавқеини мустаҳкамлашга, шунингдек, спорт соҳасидаги халқаро ҳамкорликни кенгайтиришга хизмат қилади”, дейилади ташкилот баёнотида.

УЕФАнинг 50-конгресси шу кунларда Бельгиянинг Брюссель шаҳрида бўлиб ўтмоқда. Унда Қозоғистон номидан ҚФФ бош котиби Давид Лория иштирок этмоқда.

Маълумот учун, УЕФАнинг ҳозирги президенти словениялик Александер Чеферин ҳисобланади.

Эслатиб ўтамиз, мустақилликка эришгандан сўнг Қозоғистон Осиё футбол конфедерацияси таркибига кирган эди, бироқ кейинчалик ташкилот Европага ўтишга қарор қилди. 2002 йил 25 апрелда Қозоғистон УЕФА аъзолигига қабул қилинди.

Ушбу қарор туфайли Қозоғистон терма жамоаси Европа чемпионати саралашида иштирок этади, клублар эса Чемпионлар лигаси, Европа лигаси ва Конференциялар лигасида ўйнаши мумкин.