Украинага қўшнисидан оғир зарба

Словакия бош вазири Роберт Фицо давлатга қарашли SEPS электр узатиш компаниясидан Украинага қилинаётган фавқулодда электр етказиб беришни тўхтатишни талаб қилди. Бу қарор “Дружба” қувуридаги узилишдан кейин кучайган энергетик зиддиятнинг янги ҳалқаси бўлди.

Словакия бош вазири Роберт Фицо ижтимоий тармоқдаги саҳифасида Словакияга нефть етказиб бериш қайта тикланмагани сабабли Украинага фавқулодда электр энергияси беришни тўхтатишни сўраганини эълон қилди.

Фицо 21 февралдаги огоҳлантиришини эслатиб ўтди ва SEPS ташкилотидан Украина энергия тизимини мувозанатлаш учун берилаётган оқимни узишни талаб қилди. Бош вазирнинг таъкидлашича, фақатгина 2026 йил январь ойида Украинага берилган фавқулодда электр миқдори 2025 йилнинг бутун бир йили давомида керак бўлган миқдордан икки баравар кўпдир.

Венгрия ва Словакия учун ўта муҳим бўлган “Дружба” нефть қувурига 27 январда уюштирилган ҳужумдан сўнг нефть ташиш тўхтаб қолган эди. Будапешт ва Братислава раҳбарияти Украинани нефть транзитига тўсқинлик қилиш ва вазиятдан сиёсий мақсадларда фойдаланишда айблади. Нефть оқими тўхтагач, Венгрия ва Словакия ҳам Украинага дизель ёнилғиси етказиб беришни тўхтатишга қарор қилган эди.

Роберт Фицо аввалроқ, агар Украина 23 февралгача нефть етказиб беришни тикламаса, Словакия компанияларидан ушбу мамлакатга электр энергияси беришни тўхтатишни талаб қилишини маълум қилган эди. Энергетика соҳасидаги бу ўзаро қадамлар Марказий Европа ва Украина ўртасидаги кескинликни янги босқичга олиб чиқди.