Вучичга суиқасд уюштиришда гумонланганлар қўлга олинди

Сербияда давлат тўнтаришига тайёргарлик кўриш иши бўйича икки киши ҳибсга олинди. Ички ишлар вазирлиги маълумотларига кўра, улар президент Александр Вучич ва унинг оиласига суиқасд уюштиришни режалаштирган.

Сербия ИИВ хабарига кўра, 1975 ва 1983 йилларда туғилган икки эркак Кралево шаҳрида қўлга олинган. Терговнинг тахминича, 2025 йил декабридан 2026 йил февралигача гумонланувчилар Сербиянинг конституциявий тузумини зўрлик билан ўзгартириш ва олий давлат органларини ағдариш мақсадида тил бириктирганлар.

Ҳуқуқ-тартибот идораларининг талқинига кўра, қўлга олинган шахслар қурол сотиб олиш имкониятларини муҳокама қилишган. Шунингдек, улар Сербия президенти, унинг рафиқаси ва фарзандларига ҳаётдан маҳрум қилиш мақсадида ҳужум уюштиришни режалаштирганликлари иддао қилинмоқда. Бундан ташқари, тергов Сербия ИИВ ходимларига нисбатан ҳам ҳужумлар тайёрлангани ҳақидаги талқинни кўриб чиқмоқда.

Гумонланувчилар 48 соат давомида ҳибсда ушлаб турилади, шундан сўнг улар Кралево шаҳридаги Олий давлат прокуратурасига олиб борилади.

Эслатиб ўтамиз, 2021 йил февраль ойида ҳам Сербия полицияси жиноий гуруҳ Стефан Неманя ҳайкали очилиш кунида Вучичга суиқасд тайёрлаганини маълум қилган эди. Ўшанда бунинг ортида криминал авторитет Велько Беливук тўдаси тургани айтилган. Кейинчалик бу тўда қўлга олинган, бироқ президентнинг ўзи ҳақиқатан ҳам нишон бўлганига омма олдида шубҳа билдирган эди.